KAMATI YA UKIMWI UBUNGO YATEMBELEA KIKUNDI CHA UPENDO MAVUNO GROUP

Posted on: August 20th, 2024

Kamati ya UKIMWI Manispaa ya Ubungo, Agosti 20, 2024 imefanya ziara ya kutembelea kikundi cha watu wanaoishi na maambukizi ya virusi vya UKIMWI katika mtaa wa Baruti kata ya Kimara

Kamati hiyo inayoongozwa na mwenyekiti wake naibu meya wa Manispaa ya Ubungo Mhe. Yusuf Yenga na katibu wake ambaye ni mratibu wa masuala ya UKIMWI ndugu Ally Mohamed pamoja na wajumbe, wamefika kwenye kikundi hicho katika ratiba ya ziara za kamati kwa robo ya nne mwaka wa fedha 2023/2024

Aidha akiwasilisha taarifa ya kikundi hicho Bi Rahma Abdulrasul amesema kuwa kikundi hicho kimeanzishwa Rasmi Novemba 2023 na mpaka sasa kina jumla ya wanakikundi 20 ambao kwa pamoja wanajishughulisha na shughuli za ujasiriamali ikiwemo utengenezaji wa sabuni na keki

Vile vile kikundi hicho kimeiomba kamati kuwasaidia kwenye utatuzi wa changamoto zinazowakabili ikiwemo kubwa ya mtaji ambayo inawakwamisha kwa muda mrefu sasa

Akichangia katika ziara hiyo mwenyekiti wa kamati Mhe. Yusuf Yenga amewahakikishia wanakikundi hao kuwa Manispaa ipo pamoja nao kwenye kukilea kikundi hicho na vikundi vingine vya aina hiyo lengo ikiwa ni kuwawezesha kiuchumi kwa kuwapatia mitaji kupitia mikopo ya asilimia 10 ya Halmashauri ambayo inatarajiwa kuanza kutolewa hivi karibuni

Nae diwani wa kata ya Kimara Mhe. Ismail Mvungi amepongeza taasisi ya kanisa la Word Alive Centre ambao wamekuwa walezi wa kikundi hicho kwa kuendelea kufanya kazi njema ya ujenzi mzuri wa jamii yenye uchumi imara na malezi bora