KAMPENI YA KATAA UCHAFU, SAFISHA, PENDESHA UBUNGO YAZINDULIWA, MITAA SAFI NA MICHAFU KUPEWA ZAWADI

Posted on: May 3rd, 2025

Mkuu wa Wilaya ya Ubungo Mh. Lazaro Twange ametoa wito kwa wananchi kuendelea na zoezi la usafi kila mwisho wa mwezi ili kuweka safi Halmashauri ya Manispaa ya Ubungo.

Kampeni hiyo iliyozinduliwa  Mei 3, 2025 ijulikanayo kama KAUSAPEU ( Kataa uchafu, Safisha, Pendezesha Ubungo) imeshirikisha wadau wa Mazingira , viongozi wa Serikali, Vyama vya siasa, wakuu wa Idara wa Manispaa ya Ubungo, wafanyabiashara pamoja na Wakazi wa Kata ya Msigani, Mtaa wa Kwa Yusuph ikilenga kupendezesha na kuiweka safi Ubungo.

Mh. Twange amewataka wananchi na wafanyabiashara wote kuhakikisha maeneo yote yanakuwa safi muda wote huku akitaka suala la usafi linakuwa ni suala endelevu na kwamba watakuwa wanafanya ukaguzi kila baada ya muda katika Mazingira yao.

Pia amesema kuwa hawatasita kuwachukulia hatua wananchi na wafanyabiashara wote watakaokiuka sheria, kanuni na taratibu za uhifadhi wa mazingira kwa kutumia sheria ndogo ambazo zimeelekeza kutoza faini kwa atakae bainika kuharibu mazingira.

Kwa upande wake Mkuu wa Kitengo cha Udhibiti wa taka ngumu Halmashauri ya Manispaa ya Ubungo Bw. Lawi Bernard Mgongo amesema kampeni hii kutakuwa na zawadi zitakazo tolewa kwa kila nusu ya mwaka ambapo Shilingi 600,000 itatolewa kwa mtaa utakaofanya vizuri.

"Na kila baada ya miezi sita zawadi zitatolewa kwa mtaa utakaofanya vizuri wa kwanza shilingi 600,000/= wa pili 300,000/= na watatu 200,000/=

Na Kwa Mtaa ambao utafanya vibaya utapewa Bendera ambayo itasomeka "Balozi wa Uchafu Ubungo" ~ Amesema Lawi

Nae, Mstahiki Meya Manispaa ya Ubungo Mh. Jaffary Nyaigesha amepongeza kuanzishwa kwa  kampeni hiyo na kusisitiza kuwa ni lazima tupambane kukataa uchafu na sheria ya hakuna kutupa hovyo taka lazima ifuatwe.