KAMPENI YA UPIMAJI AFYA KWA HIARI "AFYA CHECK" YAZINDULIWA HOSPITALI YA WILAYA UBUNGO, HUDUMA 7 ZA KIBINGWA ZATOLEWA BURE

Posted on: January 23rd, 2025

Hospitali ya Wilaya ya Ubungo iliyopo Kimara Baruti kwa kushirikiana na kampuni ya utengenezaji wa dawa za binadamu Denk Pharma,  Januari 23, 2025 imezindua kampeni ya kupima afya inayojulikana kwa jina la “Afya Check” ikilenga kuwapatia wananchi huduma za kibingwa za upimaji wa magonjwa mbalimbali bure kwa siku mbili.

Kampeni hiyo imezinduliwa na Mstahiki Meya wa Manispaa ya Ubungo, Mh. Jafar Nyaigesha, ambaye aliwataka wananchi na wakazi wa Wilaya ya  Ubungo kujitokeza kwa wingi kupima afya zao ambapo alieleza kuwa  huduma hiyo itatolewa bure  bila malipo yoyote.

Alieleza kuwa takwimu zinaonyesha kuwa wanaume wengi bado hawajahamasika kupima afya kwa hiari na hivyo kukwamisha jitihada za Serikali ya awamu ya sita kujua hali ya afya za wananchi wake ambayo inasaidia Serikali  katika upangaji wa bajeti za wizara ya  afya.

“Napenda kutoa wito kwa wataalam wa sekta ya afya kuendelea kutoa elimu kwa wananchi kuhusu umuhimu wa kupima afya zao kwa manufaa ya mtu mmoja mmoja na hatimaye taifa kwa ujumla wake” alisema Mh. Nyaigesha

Katika hatua nyingine, Mh. Nyaigesha ameutaja Ushirikiano kati ya Hospitali ya Wilaya ya Ubungo na kampuni ya Denk Pharma kuwa mfano mzuri wa ushirikiano kati ya sekta ya afya na wadau wa maendeleo katika kuboresha hudumza za afya kwa jamii.

Kwa upande wake Mganga mkuu wa Manispaa ya Ubungo Dkt. Tulitweni Mwinuka alisema katika siku ya kwanza ya uzinduzi wa kampeni hiyo ya upimaji iliyozinduliwa katika hospitali ya wilaya ya Ubungo, watu 500 wamejitokeza na kupima afya zao na kupatiwa ushauri na wataalam wa afya huku akisema matarajio ni kufukia watu 900 hadi 1000 kwa siku zote mbili.

Huduma zinazotolewa bure katika kipindi hiki ni pamoja na Upimaji wa kisukari, Uchangiaji wa damu, Upimaji wa saratani ya matiti na shingo ya kizazi, Kupima na kudhibiti presha, Huduma za macho, Matibabu ya kinywa na meno, Kisukari, Kupima uzito na ushauri wa afya bora.

Hata hivyo, huduma hizi zinajumuisha ushauri wa kidaktari, elimu ya lishe bora, na matibabu bure kwa wananchi wote watakaohudhuria.