KASI IONGEZEKE NA MSHUGHULIKIE KWA UDHARURA WAKE ~ KAMATI YA MIPANGO MIJI

Posted on: April 15th, 2025

Kamati ya mipango miji Halmashauri ya Manispaa ya Ubungo inayoongozwa na Mhe. Nicholaus Batalingaya, ambaye pia ni Diwani wa Kata ya Kwembe imefanya ziara kukagua miradi mbalimbali ya maendeleo ndani ya Manispaa ya Ubungo.

Ziara hiyo imefanyika April 15, 2025 ikiambatana na Wajumbe wa kamati hiyo, Wakuu wa Idara na Vitengo kujionea hatua iliyofikiwa katika Ujenzi wa jengo la upasuaji na wodi ya mama na mtoto katika kituo cha afya Makurumla ambapo wameagiza mradi huo ukamilike kwa wakati na kwa viwango vya ubora vinavyotakiwa.

Aidha kamati hiyo imeonyesha kuridhishwa na hatua za mradi huo ambao ukikamilika utahudumia wananchi zaidi ya laki mbili.

Wakiwa katika Mto Wasala kata ya Mburahati, kamati hiyo imeagiza mradi wa ujenzi wa kivuko cha waenda kwa miguu uanze mara moja katika mto huo ili kutatua changamoto wanazozipata wananchi kuvuka katika eneo hilo kwenda  eneo jingine.

Kamati hiyo pia ilifika katika mto Luhanga kata ya Mabibo kujionea athari za mabadiliko ya tabianchi ambayo yamepelekea kumomonyoka na kutanuka kwa mto huo na kuleta wasiwasi wa athari zinazoweza kùnitokeza endapo hatua za haraka hazitachykuliwa.

Ili kukabiliana na athari hizo, kamati hiyo imeagiza ifanyike tathmini ya haraka ili kujua mahitaji ya msingi kwa kushirikiana wadau kama vile TARURA, TANROADS, Kiwanda cha nguo cha NIDA na wataalam wa Manispaa ili kunusuru athari kubwa zinazoweza kujitokeza.

Vilevile, wametoa wito kwa wataalamu kuhakikisha mradi huo unazingatia utaalamu wa mazingira na kushirikisha jamii ili kuongeza ufanisi na uendelevu wake.

Pamoja na mambo mengine, wajumbe wameshauri idara ya biashara Manispaa ya Ubungo kuhakikisha inasimamia katazo la Packing bubu inayotumiwa na vishoka katika eneo hilo kwani inatumika kulaza magari yenye uzito mkubwa na kuongeza hatari ya kudidimia zaidi.

Kwa upande wa Kiwanda cha nguo NIDA kimesema kipo tayari kushirikiana na Uongozi wa Manispaa ya Ubungo kwa hali na mali ili isije ikatokea kiwanda kikasimama kutokana na athari za mazingira ya mto huo ambayo yakitokea yatakiathiri moja kwa moja.