KITUO CHA AFYA MBEZI CHA KABIDHIWA AMBULANCE MPYA

Posted on: January 12th, 2024

Manispaa ya Ubungo ina jumla ya wakazi 1,086,912 wanaume wakiwa 519,925 na wanawake 566,987 ambapo kati yao wanawake ambao wapo kwenye umri wa kuzaa ni 324,107 pamoja na watoto walio chini ya umri wa miaka mitano 113,442 ambao kimsingi wana uhitaji mkubwa wa huduma za dharura kutokana na changamoto mbalimbali za afya ambazo zina uhitaji wa rufaa na matibabu

Hayo yamesemwa na mganga mkuu wa Manispaa ya Ubungo Dkt. Tulitweni Mwinuka alipokua katika hafla ya kukabidhiwa gari jipya la wagonjwa (Ambulance) katika kituo cha Afya Mbezi jimbo la Kibamba ili liweze kusaidia wagonjwa wa rufaa na wanaohitaji matibabu ya dharura 

Kwa upande wake mgeni rasmi katika shughuli hiyo mbunge wa jimbo la Kibamba Mhe. Issa Jumanne Mtemvu ametumia nafasi hiyo kumshukuru Rais wa Jamhuri ya Muungano wa Tanzania Dkt. Samia Suluhu Hassan kwa kuendelea kulitizama jimbo la Kibamba kwa ukaribu kwenye uboreshaji wa huduma za Afya 

"Huduma za afya katika Manispaa yetu zimezidi kuimarika maradufu ya ilivyokuwa hapo awali na tunazidi kuziboresha zaidi. Rais wetu ametupa pesa zaidi ya Milioni 500 kujenga kituo cha afya cha Goba na safari hii ametuletea gari hili jipya ili litusaidie kuokoa maisha ya watu. Ni jukumu letu kulitunza na kulitumia kwa matumizi lengwa" alisema Mtemvu

Nae kaimu mkurugenzi wa Halmashauri ya Manispaa ya Ubungo Voster Mgina amempongeza mbunge kwa jitihada zake za kuboresha huduma za afya katika jimbo la Kibamba na amemuagiza mganga mkuu pamoja na mganga mfawidhi wa kituo cha afya Mbezi kuhakikisha gari hilo linatunzwa na kufanyiwa marekebisho stahiki kila mara inapobidi