LAAC YAIPONGEZA UBUNGO KWA USIMAMIZI WA MIRADI

Posted on: January 27th, 2024

Kamati ya kudumu ya Bunge ya hesabu za Serikali za Mitaa ‘LAAC’ imeipongeza Manispaa ya Ubungo kwa usimamizi wa utekelezaji wa Miradi ya afya.

Pongezi hizo wamezitoa leo tarehe 27/01/2024 walipokuwa kwenye ziara ya ukaguzi wa miradi ndani ya Manispaa ya Ubungo lengo ikiwa ikiwa ni kuona jinsi nidhamu na udhibiti wa fedha za Umma kwa kuzingatia thamani ya Fedha unazingatiwa.

Akiongea Makamu Mwenyekiti wa Kamati hiyo Mhe. Stanslaus Shing’oma Mabula sambamba na pongezi hizo pia ameiagiza Manispaa hiyo kufanya jitihada za haraka za kuhakikisha utatuzi wa haraka juu ya suala la ardhi iliyovamiwa na wananchi wa eneo iliyojengwa Hospitali ya Wilaya hiyo.

Agizo hilo limetokana na uwepo wa baadhi ya wakazi wa mtaa wa Baruti ilipojengwa Hospitali hiyo ambapo Manispaa ilibaini eneo lenye ukubwa wa zaidi ya ekari 30 limevamiwa na wananchi wa eneo hilo huku ekari 5 pekee zikiwa zimetumika kwa ajili ya ujenzi wa Hospitali hiyo.

Akisoma taarifa ya ujenzi wa Hospitali hiyo Mkuu wa Idara ya Mipango na Uratibu Ndg. Andambike Kyomo amesema Hospitali imegharimu kiasi cha shilingi 3,781,000,000 zilizotengwa kwa ajili ya ujenzi na ununuzi wa vifaa tiba kati ya hizo shilingi 3,300,000,000 zilikuwa ni Fedha kutoka Serikali kuu na shilingi 481,000,000 zilikuwa ni Fedha za mapato ya ndani ya Manispaa

Kyomo ameendelea kueleza kuwa hadi sasa ujenzi wa Hospitali hiyo umejumuisha majengo 8 likiwemo OPD, mionzi, utawala, wodi ya wazazi, maabara, stoo ya dawa, jengo la kufulia kwa awamu ya kwanza, wodi ya kawaida na nyumba ya kufua umeme kwa awamu ya pili na hadi sasa majengo yote yamekwisha kamilika na yanatoa huduma.

Kwa awamu ya tatu inatarajiwa kujenga ghorofa litakalojumuisha chumba cha upasuaji, wodi za kulala wanaume, wanawake, watoto,  huduma za macho na neno ambapo awamu hii iko katika hatua ya kibali cha mchoro.

Kwa upande wake Naibu Waziri ofisi ya Rais TAMISEMI Festo Dugange ameitaka Manispaa hiyo kuhakikisha inatenga bajeti kwa ajili ya ujenzi wa njia ya kutembelea wagonjwa ‘walk ways’ sambamba na kuhakikisha upatikanaji wa vifaa vya Hospitali.

Manispaa ya Ubungo ina jumla ya vituo 280 vya kutolea huduma za Afya vya Umma, mashirika na binafsi.