LEAT WASHIRIKIANA NA SERIKALI KUTATUA CHANGAMOTO ZA MAZINGIRA KATIKA MAENEO KOROFI

Posted on: January 26th, 2021

Shirika lisilo la kiserikali linalofanya shughuli za ulinzi na uhifadhi wa mazingira na rasilimali za maliasili la  Lawyers Environment action team (LEAT) limetembelea Kata ya Kimara mtaa wa mavurunza uliopo Wilaya ya Ubungo  kujionea  mazingira  korofi

Aidha wakati wakitembelea katika mtaa wa mavurunza wananchi  walielezea changamoto wanazozipata kutokana na mto huo kupita katika nyumba za watu na hata nyumba nyingine kusombwa na maji na kupelekea hali hatarishi kwa wakazi waliobaki na watoto wa shule kwenda mashuleni wakati wa mvua.

Akizungumza na wataalam kutoka LEAT diwani wa kata hiyo Mhe.Nuru Mbezi aliomba shirika hilo kwa kushirikiana na serikali kusaidia  namna bora ya kutatua changamoto hiyo kwa wakazi wa mavurunza  ili kuleta ahueni ya eneo hilo korofi kwa jamii kwaajili ya kuleta ustawi wa afya ya mazingira.

Aliendelea kwa kusema kuwa wanakijiji wa eneo hilo wanachukua hatua mbalimbali katika kudhibiti maji kusogea katika maeneo yao lakini jitihada zimekuwa zikifeli hata kupelekea mto huo kuendelea kusogea.

Sambamba na hayo Afisa mazingira Manispaa ya Ubungo Ndg.Ezra Guya aliomba wananchi kuzingatia pia sheria za mazingira hasa katika ujenzi wa maeneo yaliyohatarishi karibu na mito kwa kuhakikisha wanajenga nyumba zao umbali wa mita 60 kutoka katika mito hiyo

Pia Wananchi waeneo hilo waliomba serikali kuliangalia jambo hilo kwa kina zaidi na kuweza kuwasaidia kupata msaada wa kujengewa daraja iliwaweze kufanya shughuli zao hata kipindi cha mvua.