MAADHIMISHO YA WIKI YA MAGONJWA YASIYOAMBUKIZA

Posted on: November 14th, 2025

Hospitali ya Wilaya ya Ubungo  14 novemba 2025 imeadhimisha Siku ya Magonjwa Yasiyoambukiza, tukio hili limewakutanisha wataalam wa afya, wananchi, wanafunzi na wadau mbalimbali kwa lengo la kuongeza uelewa kuhusu kinga, uchunguzi wa mapema, na udhibiti wa magonjwa haya ambayo yameendelea kuongezeka katika jamii.

Maadhimisho haya yameambatana na huduma za uchunguzi bure ikiwemo vipimo vya shinikizo la damu, kisukari, uzito na urefu kwa ajili ya kupima BMI, pamoja na ushauri nasaha kuhusu mabadiliko ya mtindo wa maisha.

Akizungumza wakati wa maadhimisho hayo, Mganga Mfawidhi Dr. Nchang’wa Nhumba ameeleza kuwa kasi ya magonjwa yasiyoambukiza imekua kubwa hivyo katika kuadhimisha wiki hii tumefanya mazoezi na wananchi wanaotuzunguka kuhamasisha jamii kujikinga na magonjwa yasiyoambukiza.“Utafiti unaonesha kuwa wananchi  wengi wana viashiria vya magonjwa hayo bila kujua. Hivyo tunasisitiza umuhimu wa kufanya uchunguzi mara kwa mara, kula mlo bora, kufanya mazoezi, na kuepuka uvutaji wa sigara na matumizi ya pombe kupita kiasi,” alisema.

Dr Lucy Shirima, Mratibu wa magonjwa yasiyoambukiza amesema magonjwa yasiyoambukiza ni tatizo kubwa yakichangia takribani asilimia 70 ya vifo vinavotokea nchi zenye uchumi wa kati na chini.  Ameeleza kuwa maadhimisho haya kwa mwaka huu yamebeba kauli mbiu inayosema “Chukua hatua, dhibiti magonjwa yasiyoambukiza”

Mlezi wa hospitali ya Wilaya ya Ubungo Ndg. John Chikomo, amesema maadhimisho hayo yamelenga kuhamasisha ufanyaji mazoezi kwa jamii na watumishi ili kuweza kujikinga na magonjwa yasiyoambukiza. “Nitoe rai kwa jamii kujenga tabia ya kufanya mazoezi kwa muda usiopungua dakika 30 ili kujikinga”.

Shinikizo la damu, saratani, magonjwa ya moyo, Kisukari ni miongoni mwa magonjwa yasiyoambukizwa. Wiki ya Magonjwa yasiyoambukiza imeadhimishwa kuanzia Novemba 10 hadi 15.