MAAFALI YA DARASA LA SABA SHULE YA MSINGI REGINALD MENGI, UBUNGO MC.

Posted on: September 16th, 2023

Shule ya Msingi Reginald Mengi tarehe 16 Septemba, 2023 imefanya mahafali kwa wahitimu wa darasa la saba wapatao 62 wakiwemo 28 wa kiume na 33 wa kike.

Akiongea katika maadhimisho hayo Mhe. Juma Jaffery Nyaigesha Mstahiki Meya wa Manispaa ya Ubungo amewaasa wahitimu hao kutojihusisha na vitendo visivyofaa kwa kipindi chote watakacho kuwa nyumbani kusubiri matokeo.

Mhe. Nyaigesha amewataka wazazi na walezi wa wahitimu hao kuendelea kuwalinda na kuwafundisha yanayofaa wahitimu hao ili kuweza kujisimamia wenyewe na hivyo kuepukana na vishawishi vitakavyopelekea kuharibu malengo yao.

Nae Ndg. Bilhulda Mchaggo ameewataka wahitimu hao kwenda kuwa mabalozi wazuri kwenye jamii kwa kuenenda vyema kama ambavyo walikuwa shuleni hapo na amewataka kwenda kuweka bidii kwenye masomo yao ya sekondari ili kuweza kufikia malengo yao kwani elimu ni ufunguo wa maisha.

Katika mahafali hayo zawadi za vyeti zilitolewa kwa wanafunzi waliokuwa wakifanya vizuri kwenye masomo yao, wanafunzi wenye nidhamu, wanafunzi wanaoongoza kwa kuwa nadhifu na wanafunzi wenye vipaji mbalimbali kwa lengo la kuwapa motisha kwa yale mazuri waliyoyafanya.

Shule ya Reginald Mengi ni miongoni wa Shule 65 za Msingi za Umma zilizopo Manispaa ya Ubungo.