MAAFISA MAENDELEO JAMII UBUNGO WAJENGEWA UWEZO KUHUSU UTOAJI NA USIMAMIZI WA MIKOPO YA 10%

Posted on: October 1st, 2024

Maafisa maendeleo ya jamii Manispaa ya ubungo leo tarehe 1/10/2024  wamejengewa uwezo kuhusu utoaji na usimamizi wa mikopo ya 10% kwa mujibu wa mwongozo mpya wa mwaka 2024. Lengo la kuwapa elimu maafisa hao ni kuwawezesha namna watakavyoweza kusaidia kuhamasisha vikundi vya  vijana, wanawake na watu wenye ulemavu kujitokeza kujisajili ili waweze kupata mikopo ya asilimia 10 itakayoanza kutolewa na Halmashauri ambapo asilimia 4 kwa vijana, asilimia 4 wanawake na asilimia 2 watu wenye ulemavu

Akitoa mafunzo hayo  mratibu wa dawati la uwezeshaji wananchi kiuchumi Manispaa ya ubungo Bi. Fatuma Bangu amesema kuwa  mafunzo hayo ni ya  siku tano yeye lengo la kuwajengea uwezo maafisa Maendeleo kutoka ngazi ya Kata na Wilaya yatakayofanyika katika Ukumbi wa Mikutano wa Manispaa hiyo ikiwa ni maandalizi ya kufungua dirisha la mikopo baada ya kusimamishwa Mwezi April, 2023.

Bi. Fatuma aliendelea kusisitiza kuwa ni jukumu la  maafisa Maendeleo ya  Jamii kuhakikisha wanahamasisha uundaji wa vikundi, wanasimamia usajili na kuwajengea uwezo wanavikundi ili waweze kutumia mikopo watakayopewa kwa malengo yaliyokusudiwa na kufanya marejesho kwa wakati.

Nae Mkuu wa Idara ya Maendeleo ya Jamii Manispaa ya Ubungo Rose Mpeleta aliwasisitiza maafisa hao kuhakikisha wanafanya majukumu yao kwa weledi wanapoanza kazi hiyo ambayo serikali inategemea kupata matokeo chanya

Kwa sasa inatakiwa kila mmoja ajue na atambue anachokifanya kila mtu anawajibu wakuhamasisha na kuhakikisha kikundi kinachopata mkopo amekichunguza na kujiridhisha. Alisisitiza Mpeleta

Ikumbukwe kuwa, maelekezo ya Serikali ya awamu wa sita chini ya Dr. Samia Suluhu Hassan kuhusu utoaji na usimamizi wa mikopo hiyo inayotokana na 10% ya Mapato ya ndani ya Halmashauri tayari yamekwishatolewa na OR-TAMISEMI na leo Oktoba 1, 2024 Halmashauri ya Manispaa ya Ubungo kupitia idara ya Maendeleo ya jamii inaendelea na mafunzo ya siku tano kwa wataalam juu ya utekelezaji wa muongozo mpya wa utoaji wa mikopo hiyo.