MAAFISA MAZINGIRA WA KATA KUPIGWA MSASA

Posted on: June 15th, 2021

Shirika lisilo la kiserikali la Lawyers Environment Action Team (LEAT) kwa kushirikiana na Manispaa ya Ubungo  wamejipanga Kuja na mkakati wa kuhakikisha wanawajengea uwezo wataalam wa Mazingira ngazi ya kata kukabiliana na changamoto za kimazingira zinazotokea katika  kata  zao ikiwa ni moja ya mkakati wa kupunguza athari za kimazingira kwa wananchi.

Mkakati huo ulielezwa na Afisa Mazingira wa Manispaa ya Ubungo Ezra Guya  Wakati wa ziara  iliyofanyika  tarehe 14/6/2021 ya kutembelea maeneo ya Ubungo Kisiwani na Kibo yaliyopitiwa na Mto Gide ambao unasababisha maafa kwa wananchi ikiwemo nyumba kubomoka,  watu kushindwa  kuvuka na uhalibifu wa Mazingira kwa ujumla

" Kila afisa mazingira kwenye kata yake anatakiwa kuwaelimisha wananchi wapande miti, kutokutiririsha maji machafu kwenye mito  na kutokutupa taka  ili kutunza mazingira na pia kuepusha milipuko ya magonjwa yatokanayo na uchafu" alieleza Guya

Aidha, Guya aliwakumbusha wananchi kuzingatia Sheria ya kujenga makazi umbali wa mita 60 kutoka mtoni ilikuepusha madhara ya mafuriko na kubomolewa nyumba zao

" Ikumbukwe kuwa moja ya maeneo ambayo wananchi wana athiriwa na mafuriko   kipindi cha mvua ni yale yaliyo karibu na mito hivyo zingatieni kanuni ya kujenga umbali wa mita 60" alifafanua Ezra

Katika kuunga juhudi za Manispaa ya kukabiliana na changamoto za mazingira, Asasi ya  LEAT imeahidi kushirikiana na Manispaa katika kutatua changamoto za  mazingira katika maeneo mbalimbali ikiwemo kwenye masoko,mito na maeneo mengine ilikuhakikisha mazingira yanakuwa safi.