MAAFISA WA AFYA UBUNGO WAPATIWA MAFUNZO YA MATIBABU YA MATUMIZI YA VYAKULA VYA ASILI KWENYE KUKABILIANA NA UTAPIAMLO

Posted on: April 10th, 2025

Ugonjwa wa utapiamlo Bado umeendelea kukumba idadi kubwa ya watoto chini ya miaka mitano hali inayopelekea kuzorota kwa afya za watoto hao kutokana lishe duni, changamoto za kiuchumi, pamoja na kukosa elimu ya kutosha kuhusu makundi mbalimbali ya vyakula miongoni mwa wazazi na walezi wa watoto hao

Mapema  April 10, 2025 Manispaa ya Ubungo kupitia idara ya afya, ustawi wa jamii na Lishe imefungua mafunzo  kwa waratibu wa afya wa makao makuu ya Manispaa, wauguzi, wafamasia, maafisa lishe, ustawi wa jamii na madaktari kutoka hospitali na Vituo mbalimbali vya Afya ndani ya Manispaa ya Ubungo

Mafunzo hayo yamefanyika katika ukumbi wa hospitali ya wilaya ya Ubungo Kimara Baruti ambapo yamefunguliwa na Bi. Rehema Panga ambaye amemuwakilishi mganga mkuu wa Manispaa ya Ubungo

Akitoa mada katika mafunzo hayo mwezeshaji wa mafunzo afisa lishe wa Manispaa ya Ubungo Bi. Beatrice Mossile amesema kuwa Manispaa ya Ubungo itaanza kutekeleza mpango maalumu wa kutibu utapiamlo kwa njia za vyakula vya asili ambapo mpango huo utaanza kutekelezwa katika hospital ya wilaya pamoja na hospitali ya Sinza, Palestina

Aidha, Mossile ameeleza kuwa Manispaa ya Ubungo inakabaliwa na tatizo la utapiamlo kwa kipengele cha ukondefu asilimia 1.2%, na udumavu 1.1% Kwa watoto wa miaka 0 - 5 Ambapo amewataka wana mafunzo hayo kuyatumia vema mafunzo hayo ili yakalete tija katika kuwahudumia watoto wenye changamoto ya utapiamlo huku wakizingatia mazingira ya Dar Es Salaam na vyakula vinavyopatikana

Sambamba na Hilo mwezeshaji mwingine Bi. Germana Gasper ameeleza kuwa utapiamlo unachangia asilimia 53 ya vifo vya watoto chini ya miaka mitano nchini hivyo amesisitiza juu ya umuhimu wa kutoa elimu kwa wazazi na walezi wenye watoto juu ya dalili za utapiamlo ili matibabu yake yaanze mara moja baada ya kugundulika

Kila mtoto ni muhimu, Kila Mmoja atimize wajibu wake.