MAAZIMISHO YA SIKU YA AFYA YA MACHO DUNIANI, UBUNGO MANISPAA.

Posted on: October 12th, 2023

Manispaa ya Ubungo kwa kushirikiana na wadau mbalimbali wa masuala ya macho tarehe 12/10/2023 imeungana na Dunia katika kuazimisha siku ya afya ya macho duniani ambayo imeenda sambamba na kauli mbiu isemayo “penda macho yako mahali pa kazi”

Akiongea katika maazimisho hayo Kaimu Mratibu wa huduma za macho Manispaa ya Ubungo Dkt. Shubira Bachuba ameeleza kuwa tatizo la uoni hafifu na upofu linaendelea kuongezeka kwa kasi kubwa Duniani ambapo inakadiriwa watu Bilioni 1.1 wana uoni hafifu wa mbali na karibu na asilimia 90 ya watu hao wanaweza kuzuia hali hiyo.

Dkt. Bachuba ameendelea kueleza kuwa kwa Tanzania 0.5 - 1% ya wakazi wote ni vipofu huku Manispaa ya Ubungo kwa kipindi cha miaka minne mfululizo kuanzia 2018 - 2022 idadi ya watu wenye uoni hafifu na upofu imeendelea kuongezeka kutoka watu 17 hadi kufikia watu 30

Akiongelea mafanikio yaliyofikiwa juu ya uboreshaji wa huduma za afya ya macho Dkt. Bachuba ameeleza kuwa Manispaa ya Ubungo imefanikiwa kufanya huduma ya Mkoba lengo ikiwa ni kufanya uchunguzi na kutoa elimu ya afya ya macho kwenye jamii na shule mbalimbali sambamba na kuwajengea uwezo watumishi wasio wa macho namna ya kutoa matibabu kwa wagonjwa wa macho na matumizi sahihi ya dawa za macho

Aidha, Dkt. Bachuba ameendelea kueleza kuwa kwa mwaka huu 2023 katika kuazimisha siku hii Manispaa ya Ubungo ilifanikiwa kupima afya ya macho kwa watumishi mbalimbali wa Manispaa hiyo na jumla ya watumishi 1834 walihudumiwa katika vituo mbalimbali ikiwemo ofisi ya Mkuu wa Wilaya na Mkurugenzi, Kituo cha mabasi cha Magufuli na vituo mbalimbali vya kutolea huduma za afya

Akimuwakilisha Mkurugenzi wa Manispaa ya Ubungo katika maazimisho hayo Dkt. Tulitweni Mwinuka ametoa rai kwa watumishi na wananchi kwa ujumla kuwa na utaratibu wa kupima afya mara kwa mara ili kukabiliana na magonjwa yasiyoambukiza ikiwemo magonjwa ya macho

Wadau walioshiriki kutoa huduma za macho kwenye vituo mbalimbali katika kuazimisha maazimisho haya ni pamoja na Dr Agarwals eye Hospital, Interantional eye Hospital, Vision care center Goba, Sunsight Sinza, Optical Center Mbezi, A1 Solution Mbezi, Msamaria Seko eye center

pichani ni Mtumishi akipimwa macho