MAFUNZO YA WASIMAMIZI WA UCHAGUZI NGAZI YA KATA YAZINDULIWA

Posted on: August 4th, 2025

Manispaa ya Ubungo imezindua mafunzo kwa Wasimamizi Wasaidizi wa Uchaguzi ngazi ya Kata.Maafisa Wasimamizi Wasaidizi wa Uchaguzi wasisitizwa kuzingatia Sheria ya uchaguzi kwa mujibu wa Katiba.

 Halmashauri ya Manispaa Ubungo  Agosti 4, 2025 imezindua mafunzo kwa Wasimamizi Wasaidizi wa Uchaguzi ngazi ya Kata yanayotarajiwa kufanyika kwa muda wa siku tatu ambapo Wasimamizi Wasaidizi 42 wa Kata 14 za Manispaa hiyo wameshiriki Mafunzo hayo ambayo yanalenga kuwajengea uwezo wa namna ya kusimamia uchaguzi mkuu wa Madiwani, Wabunge, na Rais wa Jamhuri ya Muungano wa Tanzania.

Akifungua rasmi mafunzo hayo, Msimamizi Mkuu wa Uchaguzi wa Majimbo ya uchaguzi ya Kibamba na Ubungo, Rose Mpeleta amewataka Wasimamizi wa Uchaguzi ngazi ya Kata kuzingatia mafunzo wanayopewa ili yawasaidie kutekeleza jukumu la kusimamia uchaguzi utakaofanyika mwezi Oktoba 2025. Pia amesema mafunzo hayo yatawajengea uwezo wa kuzielewa Sheria, kanuni, taratibu, miongozo na maelekezo mbalimbali kutoka Tume Huru ya Taifa ya Uchaguzi.

Aidha, Mpeleta amewahimiza Maafisa hao kusoma na kuelewa vizuri Katiba ya Jamhuri ya Muungano wa Tanzania hasa Sheria na Kanuni za uchaguzi, ili kujua vizuri majukumu yao na namna ya kuyatekeleza kipindi chote cha mchakato  mzima wa uchaguzi.

"Mnategemea kuwajibika ipasavyo kwa tume ya uchaguzi kama mlivyokula kiapo cha kuitumikia Tume ya Uchaguzi. Mafunzo haya yawasaidie kuwajengea uwezo, badilishaneni uzoefu kupitia mijadala inayoendeshwa hapa kwenye mafunzo,". Amesema Mpeleta.

Kabla ya kuanza kupata mafunzo hayo, Maafisa Wasimamizi Wasaidizi wa Uchaguzi ngazi ya Kata walikula kiapo cha kukana uanachama wao kwa vyama vya siasa, na kutojihusisha na shughuli zozote za vyama vya siasa kwa muda wote ambao wataitumikia Tume ya Taifa ya Uchaguzi mbele ya hakimu wa mahakama ya Tanzania Willium Julius Kaaya

Vile vile, mafunzo hayo yamehudhuriwa na mratibu wa tume huru ya Uchaguzi kwa Mkoa wa Dar Es Salaam ndugu Gerald Sondo ambaye amesisitiza kutekeleza majukumu kwa kuzingatia kanuni, miongozo, Sheria na taratibu za tume huru ya uchaguzi