MAKABURI 29 YA UFI UBUNGO KISIWANI YAHAMISHWA KUPISHA UPANUZI WA BARABARA.

Posted on: July 10th, 2025

Jumla ya Makaburi 29 yamehamishwa katika eneo la Makaburi ya Ufi yaliyopo mtaa wa Kisiwani kata ya Ubungo na kupelekwa makaburi ya Serikali ya Mianzini, mtaa wa kwa Jongo kata ya Makurumla ili kupisha upanuzi wa barabara ya Ubungo - Kimara awamu ya kwanza BRT A.

Shughuli hiyo iliyofanyika Julai 10, 2025 imehusisha uhamishaji wa masalia ya miili 29, 8 ya Waislam na 21 ya Wakristo ambapo kati ya makaburi 29, Makaburi 6 ndugu zao hawakujitoza ambapo kati ya hayo, Makaburi Manne yametambuliwa kwa majina yaliyokuwepo kwenye makaburi huku Mawili pekee ndiyo yakishindwa kutambuliwa kabisa.

Akizungumzia zoezi hilo Afisa Afya Halmashauri ya Manispaa ya Ubungo Bw. Hassan Chitu amesema Makaburi yaliyohamishwa ni yale yaliyopo karibu na barabara hiyo ya Ufi ( Ubungo Maziwa - Shekilango ) kama ambavyo yameainishwa na Mpimaji (Surveyor) wa ujenzi wa mradi huo wa barabara inayotarajiwa kujengwa kwa kiwango cha lami.

Ujenzi huo wa barabara unatekelezwa na Mkandarasi wa China Sichuan Road and Bridge Group Corporation Ltd (SRBG) anayehusika na upanuzi wa Barabara ya Ubungo -  Kimara na barabara Shikizi za Morogoro na Kawawa.

Kwa mujibu wa tangazo lililotolewa Jumatano ya Septemba 25, 2024, Mkandarasi SRGB alitoa siku 7 hadi Oktoba 2, 2024 ndugu kujitokeza ofisi za Serikali ya Mtaa wa Kisiwani kwaajili ya utambuzi kabla ya kuhamishwa ambapo zaidi ya ndugu 100 walijitokeza.

"Kwa mujibu wa sheria ya uhamishaji wa makaburi ya Februari 6, 1969 inataka matangazo yatolewe miezi mitatu kabla. Na sisi, Matangazo yalitolewa kwenye vyombo vyote vya habari, ikiwemo Redio, Magazeti, na televisheni" amesema Chitu

Kwa upande wake Mwenyekiti wa Mtaa wa Kisiwani, Ovin Ndimbo amesema ndugu walijitokeza katika ofisi hizo baada ya kupata taarifa zilizokuwa zinatolewa na mkandarasi huyo maeneo mbalimbali ikiwemo misikitini na makanisani.

"Zoezi limeenda vizuri, tulichokifanya kama viongozi ilikuwa ni kukusanya taarifa na orodha ya watu wote halafu michakato mingine imesimamiwa na mkandarasi."- amesema Ndimbo