MAKARANI WAONGOZAJI WAPIGA KURA UBUNGO WAPATA MAFUNZO ELEKEZI

Posted on: October 22nd, 2020

Msimamizi wa Uchaguzi wa Jimbo la Ubungo na Kibamba, Beatrice Dominic  amewataka   Waongozaji wapiga kura watakaoshiriki katika usimamizi wa Uchaguzi mkuu unaotarajia kufanyika Oktoba mwaka huu kuzingatia maadili, Sheria, kanuni na taratibu za Uchaguzi ili zoezi hilo lifanyikike Kwa Amani,haki na  utulivu.

Rai hiyo imetolewa Leo tarehe 22 oktoba, 2020 na Msimamizi wa Uchaguzi huyo wakati akifungua mafunzo ya makarani hao 4020  yaliyofanyika katika kumbi za mikutano chuo kikuu cha Dar es salaam.

Beatrice amewaeleza kuwa kazi ya karani katika kituo cha kupigia kura inaweza kufanikisha au kuharibu zoezi la uchaguzi hivyo kila mmoja azingatie maelekezo atakayopewa na viongozi wake kwenye kituo cha kupigia kura ili kuondoa malalamiko wakati wa uchaguzi

Pia,  Beatrice amewaambia makarani hao kuwa "Serikali imewaamini ndio maana mmechaguliwa kufanya kazi ya ukarani katika Uchaguzi huu, tambueni hatima ya wilaya ya Ubungo iko mikononi mwenu"

Makarani wamesisitizwa kuzingatia viapo vyao vya kutunza Siri za uchaguzi na tamko la kutokuwa mwanachama wa chama chochote cha siasa ili wasiwe na upendeleo Kwa chama fulani.

Makarani waogozaji wapiga kura majimbo ya Ubungo na Kibamba wakipata maelekezo kuelekea uchaguzi Mkuu oktoba, 2020

Aidha Msimamizi wa Uchaguzi amewaelekeza  makarani hao kuwa "Siku ya uchaguzi karani wa kituo  hautaruhusiwa kuvaa mavazi ya chama chochote  cha siasa kwani mumeapa kujitoa kwenye ufuasi wa vyama vya siasa siku ya uchaguzi"

Makarani wamesisitizwa kuwa kazi wanayoenda kufanya inahitaji ustahimilivu, unyenyekevu na kauli nzuri kwa wapiga kura ili kufanikisha zoezi kwa amani na utulivu kwa kuwaongoza wapiga kura kuingia katika chumba cha kupigia kura.

 Manispaa ya Ubungo ina jumla ya vituo 1545 vya kupigia kura katika Uchaguzi mkuu wa mwaka huu kwa jimbo la Ubungo na Kibamba.