MANISPAA YA ILEMELA YATEMBELEA UBUNGO

Posted on: November 21st, 2023

Wajumbe wa kamati ya fedha kutoka Manispaa ya Ilemela wametembelea kituo cha mabasi cha Magufuli bus Terminal kilichopo Mbezi katika  Manispaa ya Ubungo kwaajili ya kujifunza namna Manispaa ya ubungo  inavyoendesha kituo hicho sambamba na ukusanyaji wa mapato 

Akiongea baada ya kuwapokea, Mstahiki Meya Manispaa ya Ubungo Mhe. Jaffery Nyaigesha leo tarehe 22 novemba, 2023 aliwakaribisha na kuwaeleza namna ambavyo Manispaa ya Ubungo imekua ikikusanya mapato kupitia kituo hicho ambacho kimesaidia Manispaa kupata mapato zaidi.

Aliendelea kueleza kuwa, mapato katika kituo hicho yamekuwa yakikusanywa kwa kutumia Mfumo wa N - card ni gharama kusimika mfumo huo lakini unasaidia mapato hayapotei. Hapo awali kwa kutumia POS machine makusanyo yalikua hayadhibitiwi vizuri  lakini baada ya mfumo wa N - card kuanza mapato yanakusanywa vizuri na hayapotei.

Akiwasilisha taarifa ya uendeshaji wa kituo hicho, Mkuu wa Idara ya  Mipango na ufuatiliaji Manispaa ya Ubungo Ndg. Andambike Kyomo amesema kuwa Manispaa ya Ubungo kwa Mwaka wa fedha 2023/2024 imekasimia kukusanya kiasi cha shilingi bilioni 6 kutoka katika kituo hicho na vyanzo vya mapato hayo hukusanywa kutoka katika vyanzo mbalimbali vilivyopo katika stendi hiyo ikiwemo kodi za upangishaji, maegesho ya magari, matangazo ya biashara, kukodi vizimba, faini, mapato ya matoroli, bajaji, bodaboda, tax, na magari binafsi

Aliendelea kueleza kuwa mpaka sasa utekelezaji wa mradi huo umefikia asilimia 97 ambapo gharama za mradi huo utagharimu kiasi cha shilingi  bilioni 50.9 mpaka kukamilika.

Nae, kaimu Mkurugenzi wa Manispaa ya ilemela ndg. Egidy Teulasi  ameishukuru Manispaa ya Ubungo kwa kuwezesha kupata elimu ya uendeshaji wa kituo hicho ambayo itaenda kusaidia katika kuendesha stendi iliyopo katika Manispaa  ya ilemela na kupongeza namna mfumo  wa N - card unavyofanya kazi katika stendi hiyo.

"Tutahakikisha tunaenda kufanyia kazi elimu tuliyopata hasa mfumo wa N - card ili kudhibiti upoteaji wa mapato" alisisitiza Teulasi