MANISPAA YA UBUNGO YAANZA KAZI RASMI SOKO LA MABIBO

Posted on: August 18th, 2023

Kufuatia agizo la Mkuu wa Mkoa wa Dar es Salaam Mhe. Albert Chalamila alilolitoa jana la  kuvunja uongozi wa soko la Mabibo na kulikabidhi kwa Manispaa ya Ubungo na kuagiza shughuli zote zilizokuwa zikifanywa na uongozi uliovunjwa. Leo Agasti 18, 2023 Manispaa imeanza kazi rasmi ya usimamizi wa soko hilo ikiwa ni pamoja na ukusanyaji wa ushuru kama ilivyokuwa awali bila kufanya mabadiliko yoyote ya tozo hizo.

Kutokana na mabadiliko hayo, wafanyabiashara wamepongeza hatua hiyo na kuonesha ushirikiano wa dhati kwa kutoa ushuru kwa Hiari 

Kwa upande wa wafanyabiashara wa soko hilo wamepokea vizuri mabadiliko hayo na ni mategemeo yao kuwa Manispaa itafanya maboresho ya miundombinu kwenye soko hilo.

Esther Ngowi mfanyabiashara wa nyanya sokoni hapo anaeleza kuwa "Soko letu linahitaji maboresho makubwa ya miundombinu, ukiangalia kipindi cha mvua hatuuzi, humu ndani ni tope tu, kuna baadhi ya wateja wetu wanashindwa kufika humu ndani inapelekea mauzo kushuka. Labda kwa mabadiliko haya tutegeme chochote".

Aidha, Esther amesema Halmashauri kuanza kusimamia soko hili wafanyabiashara kuwajibika kutoa ushuru kwani tuna imani maboresho makubwa yatafanyika  kwenye soko letu hivyo tutakuwa na mazingira Bora ya kufanyia biashara.

Kwa awamu ya kwanza, Manispaa imejipanga kuboresha soko hilo ambapo tayari kiasi cha shilingi milioni 600 zimeshatengwa kwa ajili ya kuboresha miundombinu ya soko hilo ikiwemo ukarabati wa vyoo, ujenzi wa mitaro na ujenzi mabanda  12.

Halmashauri, inawashukuru wafanyabiashara wa soko hilo kwa kuonesha ushirikiano kwa Manispaa kutekeleza majukumu ya kusimamia soko na kudumisha utulivu  ndani ya soko.