MARUFUKU MICHANGO ISIYO NA KIBALI MASHULENI

Posted on: January 29th, 2024

Wakuu wa Shule, Walimu Wakuu na Waratibu Elimu Kata wametakiwa kuimarisha mahusiano mazuri mahali pa kazi ili kuepuka migogoro, kuhujumiana na kupunguza ari ya utendaji kazi mambo yanayopelekea utoaji wa huduma kuwa chini ya kiwango.

Kauli hiyo imetolewa na Mkuu wa Wilaya ya Ubungo Mhe. Hashim Abdallah Komba kwenye kikao kazi na Maafisa elimu, Wakuu wa Shule, Walimu wakuu, Waratibu Elimu Kata kilichofanyika leo tarehe 29/01/2024 katika ukumbi wa mikutano wa Manispaa ya Ubungo.

Mhe. Komba ameendelea kusistiza kuwa Kama viongozi katika Shule zao wanapaswa kufanya vikao vya mara kwa mara ili kusikiliza na kutatua kero za walimu pamoja na  kuimarisha ushirikishwaji wa masuala ya uendeshaji wa Shule, kwani walimu wote wana haki ya kujua kinachofanyika shuleni lakini pia kukumbushwa wajibu wao.

" Imarisheni mahusiano, jengeni utamaduni wa kusikiliza matatizo ya walimu wenu na kuyatatua, na kuwashirikisha mambo yote yanayoendelea shuleni, hii itapunguza manung'uniko na Malalamiko kwa walimu" alisema Mhe. Komba.

Aidha, Mhe. Komba ametumia kikao hicho kuwataka

Walimu Wakuu na Wakuu wa Shule kuacha mara moja uchangishaji wa michango isiyo na kibali  katika Shule zao mpaka pale mwongozo wa kiwilaya utakapotangazwa rasmi kwani michango hiyo imekuwa kero kubwa  kwa wazazi na walezi. 

Pia amewataka Waratibu Elimu Kata kutekeleza majukumu yao kwa kusimamia miongozo ya Serikali katika utoaji wa elimu na wahakikishe michango isiyo na kibali wala tija kwa wananchi iachwe mara moja.

Manispaa ya Ubungo ina jumla ya wanafunzi 147,186 kati yao wanafunzi 105,983 ni wa Shule za Msingi na wanafunzia  41,203 ni wa Shule za sekondari.