MCHONGO NI AFYA YAKO,ZINGATIA UNACHOKULA

Posted on: October 30th, 2024

UBUNGO YAADHIMISHA SIKU YA LISHE KITAIFA

MCHONGO NI AFYA YAKO,ZINGATIA UNACHOKULA

Hiyo ni Kauli mbiu ya Lishe kitaifa ambapo  tarehe 30 oktoba, 2024 Manispaa ya Ubungo imeadhimisha siku hiyo muhimu katika uwanja wa shule ya msingi Makuburi kwa kutoa elimu ya masuala ya lishe, tathimini ya hali ya lishe na uchunguzi wa magonjwa yasiyoambukiza kwa jamii.

Akisoma taarifa Afisa lishe Manispaa ya Ubungo Beatrice Mossile amesema kuwa, lengo la maadhimisho hayo ni kutoa elimu ya lishe kwa jamii kwa kuzingatia mapendekezo ya mwongozo wa kitaifa wa chakula na ulaji ili kuondoa dhana potofu na mitazamo hasi iliyopo inayohusu ulaji na ulishaji watoto katika jamii zetu

Aliendelea kusema kuwa, malengo mahususi pia ni Kuhamasisha jamii kuzingatia ulaji wa makundi sahihi ya vyakula, kuelimisha jamii kuhusu umuhimu wa kufanya mazoezi ili kujenga mwili, kuunganisha jamii na wadau katika jitihada za kuendeleza na kuimarisha afya

Aidha, Mgeni rasmi katika maadhimisho hayo ambaye pia ni diwani wa Kata ya Makuburi Mheshimiwa Quirine Shirima ameishukuru Manispaa kwa kuchagua kata hiyo ili kufanyia maadhimisho hayo ambayo yameenda kutoa elimu kwa wakazi hao na kupata huduma ya matibabu bure

Shirima aliendelea kuwasisitiza wakazi wa Makuburi kuzingatia siku hiyo muhimu ambayo imelenga pia kupunguza utapia mlo kwa watoto wenye kinga hafifu na kuboresha afya ya jamii kwa ujumla na kutoa huduma za upimaji bure

Nae, Mganga Mkuu Manispaa ya Ubungo Dkt.Tulitweni Mwinuka amemshukuru mgeni rasmi kwa ujio wake katika maadhimisho hayo yaliyolenga kusaidia jamii kupata uelewa wa masuala ya lishe pamoja na upimaji wa afya bure.

Sambamba na hayo katika maadhimisho hayo kumekuwa na elimu ya masuala mbalimbali ya afya na kuwajengea uwezo wananchi kuelewa namna ya  kujiunga na bima ya ICHF ambayo ina gharama nafuu na  wananchi wamehamasisha kukata bima hiyo ili kurahisisha kupata matibabu ambapo Kaya ya watu isiyopungua watu sita ni shilingi 150,000/= na mtu mmoja shilingi 40,000/=