MD UBUNGO AKUTANA NA WATENDAJI KUJADILI USAFI WA MAZINGIRA.

Posted on: November 28th, 2023

“Ninawaagiza watendaji wa Kata na Mitaa kuhakikisha wakandarasi au vikundi vya kuzoa taka vyote vilivyopo kwenye maeneo yenu vinalipwa malipo yao wakati” 

Kauli hiyo imetolewa  tarehe 28/12/2023 na Mkurugenzi wa Manispaa ya Ubungo Elias Ntiruhungwa katika kikao kilichojumuisha watendaji wa Kata na Mitaa, wenyeviti wa mitaa na wakandarasi au vikundi vya kuzoa taka mitaani kilichofanyika katika ukumbi wa Manispaa hiyo kilicholenga kujadili masuala mbalimbali ya usafi wa mazingira ndani ya Manispaa hiyo.

Ntiruhungwa ameendelea kueleza kuwa ucheleweshwaji  wa malipo ya fedha kwa wakandarasi hao umekuwa ukichochea kwa kiasi kikubwa maeneo mengi kuwa machafu kitendo ambacho kinaweza kupelekea kusababisha magonjwa ya mlipuko.

Aidha, Ntiruhungwa amewataka watendaji hao kuhakikisha sheria za uchafuzi wa mazingira zinasimamiwa vyema ikiwemo na utoaji wa elimu ya usafi wa mazingira kwa wananchi sambamba na kuwachukulia hatua wachafuzi wa mazingira na wanaokiuka kulipa ada ya usafi wa mazingira kwenye maeneo yao.

Sambamba na hayo Ntiruhungwa amewataka wakandarasi kuhakikisha taka zinaondolewa kwa wakati kwenye maeneo wanayoyafanyia kazi ili kuimarisha usafi kwenye maeneo hayo.

Kwa upande wake Mwenyekiti wa kikundi kinachozoa taka Mtaa wa Mianzini Mariam Abdi ameeleza kuwa changamoto ya malipo yao yanatokana na mfumo mpya wa TAUSI ambao mara nyingi umekuwa ukisumbua hivyo ameiomba Serikali kuondoa changamoto za mfumo huo ili kuleta mazingira mazuri ya utendaji kwa wakandarasi hao na hivyo kuchochea hali ya usafi wa mazingira kwenye maeneo yetu.

Manispaa ya Ubungo inajumla ya Mitaa 90 na Kata 14 ambayo inawazabuni ambao wapewewa jukumu la kuzoa taka kwenye mitaa hiyo na kuzifikisha dampo kwa lengo la kuhakikisha maeneo yote yanakuwa safi muda wote.