MDAU WA MAENDELEO ATOA MADAWATI 20 SARANGA

Posted on: February 9th, 2024

Manispaa ya Ubungo tarehe 09/02/2024 imepokea msaada wa madawati 20 kutoka kwa mdau Dr. Agnetha Mhenga ambayo yamekabidhiwa katika Shule ya Msingi Saranga iliyopo Kata ya Saranga.

Akiongea wakati wa kupokea madawati hayo kwa niaba ya Mkurugenzi wa Manispaa hiyo Denis Nyoni Afisa elimu Msingi wa Manispaa amesema amefurahishwa na msaada wa madawati hayo ambayo kwa kiasi kikubwa yatapunguza changamoto ya uchache wa madawati katika Manispaa hiyo.

Nyoni ameendelea kueleza kuwa Manispaa ya Ubungo inauhitaji wa madawati zaidi ya elfu 10 hadi sasa yaliyopo ni madawati elfu 5 na madawati mapya ambayo yanaendelea kutengenezwa na Manispaa hiyo ni madawati elfu 4 ambayo yatagaiwa katika Shule mbalimbali za Msingi ndani ya Manispaa hiyo.

Sambamba na hayo Nyoni amewataka wanafunzi wa Shule hiyo kutunza madawati hayo huku akiwataka walimu kuongeza jitihada za ufundishaji ili kuweza kuongeza ufaulu kwa wanafunzi wa Shule hiyo.

Kwa upande mdau aliyetoa madawati hayo Dr. Agetha Mhenga amesema yeye binafsi ameguswa kutoa madawati hayo baada ya kuona uhitaji wa madawati ndani ya Shule hiyo na kueleza mpango wake wa kufungua NGO ambayo itamuwezesha kutoa misaada zaidi ya madawati kwa Shule mbalimbali Nchini.

“Mimi pia nimesaidiwa na watu hadi hapa nilipofikia japo sina kikubwa cha kutisha ila nitatumia hiki kidogo nilichonacho kurudisha kwa jamii, mpango wangu ni kuwa na ‘foundation’ itakayoniwezesha kutoa misaada zaidi kwa jamii huu ni mwanzo pokee hiki kidogo naahidi kutoa zaidi hapo mbeleni” alisema Mhenga.

Akishukuru msaada huo kwa niaba ya wananchi wa Kata ya Saranga Mhe. Laizer ametoa wito kwa jamii kuiga mfano huu wa kurudisha kwa jamii kama ambavyo amefanya Mhenga kwani Serikali pekee haiwezi kutatua changamoto zote kwa wakati mmoja.