MGOGORO WA ARDHI KINZUDI KUFIKA MWISHO

Posted on: May 10th, 2023

MGOGORO WA ARDHI KINZUDI KUFIKA MWISHO

Manispaa ya Ubungo imemaliza mgogoro wa ardhi eneo la kwa mzungu lililopo Kinzudi kata ya Goba baada ya viongozi wa Manispaa hiyo kukutana na viongozi wa Manispaa ya Kinondoni ili kujiridhisha kuwa eneo hilo lipo Manispaa ya Ubungo.

Mgogoro huo uliibuliwa na Diwani wa Kata ya Goba Mh. Esther Ndoha kufuatia eneo linalomilikiwa na Halmashauri ya Manispaa ya Ubungo kuvamiwa na watu akiwemo mfanyabiashara Macdonald huku akidai kuwa eneo hilo lipo Manispaa ya kinondoni na wana vielelezo jambo lililopelekea wakuu wa Wilaya, Wakurugenzi, Mameya na wataalamu kutoka Wilaya zote mbili kufika kwenye eneo hilo la kinzudi.

Akizungumza katika baraza la Madiwani la robo ya tatu ya mwaka 2022/2023 la Manispaa ya Ubungo lililofanyika tarehe 09 Mei, 2023 Mkuu wa Wilaya hiyo Mhe. Hashim Komba amesema wataalamu kutoka pande zote mbili hususani Kinondoni wamethibitisha kuwa eneo hilo lipo Manispaa ya Ubungo na ameagiza Manispaa hiyo kuhakikisha maeneo yote yanayomilikiwa na Manispaa hiyo yanapimwa na kuwa na hati ya umiliki ili kuepuka uvamizi wa maeneo hayo.

Aidha, Mhe. Komba amewataka Madiwani na watendaji wa Manispaa hiyo kusimamia ukusanyaji wa mapato na kuziba mianya ya upotevu wa fedha ili kuweza kukamilisha utekelezaji wa miradi mbalimbali ya maendeleo.

Kwa upande wake Mkurugenzi wa Manispaa hiyo Ndg. Beatrice Dominic amesema Manispaa itahakikisha ukusanyaji wa mapato unasimamiwa vizuri ikiwa ni pamoja na kutekeleza na kusimamia miradi ya Maendeleo.

Nae Mstahiki Meya wa Manispaa hiyo Mhe. Jaffary Juma Nyaigesha mbali na kuweka msisitizo kwenye ukusanyaji wa mapato amesema eneo lililovamiwa Kinzudi litalindwa na wavamizi wote wataondolewa na litaendelea kuwa ni eneo la Manispaa hiyo.