MIAKA 62 YA UHURU VIJANA ONGEZENI UWAJIBIKAJI

Posted on: December 9th, 2023

Ikiwa ni  tarehe 9 disemba 2023 watanzania  wakiadhimisha miaka 62 ya Uhuru wa Tanzania Bara, Mkuu wa Wilaya ya Ubungo Mhe. Hashim Abdallah komba amewataka wanaubungo kutafakari maelekezo ya Rais wa Jamhuri ya Muungano wa Tanzania Mhe. Samia Suluhu Hassan katika kujenga Tanzania yenye maendeleo makubwa kwa miaka 62 ijayo.

Mhe. Komba ameyasema hayo wakati akihutubia wananchi walioshiriki kwenye kongamano la maadhimisho ya Uhuru katika Wilaya hiyo lililofanyika katika ukumbi wa shule sekondari mbezi high na kusema kuwa ili kizazi kijacho kiweze  kuona mafanikio ya Uhuru kwa miaka 62 ijayo ni lazima vijana wa leo kufanya tafakuri ya namna ya kuleta maendeleo kwa kuzingatia falsafa ya maridhiano, ustahimilivu, mageuzi katika uwajibikaji na ujenzi mpya wa nchi yetu kwani maendeleo tunayoyaona leo  ni matokeo ya juhudi za wazee wetu ambao walijitoa kwa hali na mali katika kujenga nchi baada ya Uhuru.

Mhe. Komba amesisitiza kuwa, Vijana wa zamani baada ya Uhuru walijitolea Muda wao, mali, nguvu na hata uhai kwa ajili ya kuijenga nchi na kufanikiwa kufikia maendeleo ya sasa hivyo ni jukumu letu vijana wa sasa kuwajibika ipasavyo katika kuijenga nchi yetu na kufikia maendeleo kwani msingi wa elimu bora na siasa safi upo.

"wakati tunafanya maadhimisho haya ya miaka 62 ya uhuru ni vema kujiuliza je, fedha za miradi ya maendeleo zinazotolewa na serikali na kusimamiwa na vijana wasomi ina ubora kama miradi ya zamani iliyosimamiwa na vijana ambao hawakuwa na elimu kubwa kama sasa? tubadilike na tutumie elimu zetu kwa manufaa ya taifa letu" alieleza Mhe. Komba

Baada ya uhuru serikali ilianza kupambana na maadui watatu yaani ujinga umasikini na maradhi, leo tunaadhimisha miaka 62 ya uhuru maadui hawa wamepigwa kwa kiwango kikubwa kwani uboreshaji mkubwa umefanyika katika sekta ya Elimu, Afya na uwezeshaji wananchi kiuchumi, hivyo jukumu letu la sasa ni kuendeleza juhudi hizi kwa kutoa huduma bora na kulinda amani na utulivu wa nchi yetu.

Aidha, Serikali imeelekeza sherehe hizi zifanyike kwa njia ya makongamano ili kutoa fursa ya kujadili dhana ya uhuru na kuwapa vijana wa leo nafasi ya kutafakari mafanikio yaliyofikiwa na nchi yetu kwa miaka 62 ya uhuru