MKOMBOZI SEKONDARI IKO SALAMA, MASOMO YANAENDELEA

Posted on: May 16th, 2024

"Kazi ya serikali ni kuwalinda nyie na kesho ya ndoto zenu. Kwa kipindi chote nitakachokuwepo hapa Ubungo, Bila kujali tabaka la mtoto, hakuna kesho ya mtoto yoyote itaharibikiwa kwa kuuziwa bangi, sigara au mihadarati yoyote"

Hayo yamesemwa Mei 16, 2024 na mkuu wa wilaya ya Ubungo Mhe. Hassan Bomboko alipofanya ziara katika shule ya sekondari Ukombozi iliyopo kata ya Saranga kwaajili ya kuangalia mustakabali wa wanafunzi katika shule hiyo kwenye masuala ya taaluma na nidhamu

Ziara hiyo imekuja kufuatia taarifa mbalimbali zilizotolewa kuhusu matumizi ya mihadarati katika shule ya sekondari Ukombozi ambapo baada ya ziara hiyo imebainika kuwa taarifa hizo hazikuwa na ukweli na wanafunzi katika shule hiyo wanaendelea  masomo yanaendelea vema

Katika ziara hiyo DC Bomboko ameagiza kufanyika kwa oparesheni kabambe kwa jeshi la polisi kuwakamata wauzaji na wasambazaji wa mihadarati katika maeneo yote ya wilaya ya Ubungo ili kuwalinda wanafunzi  na jamii kwa ujumla

Aidha DC Bomboko amemuagiza afisa elimu sekondari kuhakikisha wanafanya ufuatiliaji katika mashule zote ili kudhibiti maeneo yote yanayotiliwa shaka kutokana na matumizi ya mihadarati na kujihusisha na masuala ya usagaji na ulawiti

Vilevile imetolewa rai kwa viongozi mbalimbali kuhakikisha wanapata taarifa sahihi kuhusu masuala mbalimbali katika jamii zetu ili kutokuleta taharuki kwa wananchi, aliongeza Bomboko

Nae diwani wa kata ya Saranga Mhe. Laizer ametumia nafasi ya ziara hiyo kumshukuru Dc Bomboko kwa ziara hiyo ambayo itasaidia kwenye harakati za kukomesha matumizi ya mihadarati katika shule hiyo na shule zingine za kata ya Saranga na Ubungo kwa ujumla