MKURUGENZI UBUNGO AKAGUA MIRADI YA MAENDELEO

Posted on: February 9th, 2024

Mkurugenzi wa Manispaa ya Ubungo Elias Runeye Ntiruhungwa  tarehe 09/02/2024 amefanya ziara ya ukaguzi wa miradi mbalimbali ya maendeleo inayotekelezwa na Manispaa hiyo, ukiwemo mradi wa ujenzi wa nyumba ya Mkurugenzi wa Manispaa hiyo na Shule ya wasichana ya Mkoa ya Dar es salaam iitwayo Shule ya Sekondari Dar es salaam.

Akiongea wakati wa ukaguzi wa miradi hiyo Ntiruhungwa amewataka wakandarasi wa miradi hiyo kukamilisha kwa wakati ujenzi wa miradi hiyo sambamba na kuzingatia ubora wa miradi hiyo.

Sambamba na hayo Ntiruhungwa amemtaka Mhandisi wa Manispaa hiyo kuhakikisha miradi hiyo inajengwa kwa ubora unaostahiki ili iendane na thamani ya fedha iliyotolewa.

Mradi wa ujenzi wa nyumba ya Mkurugenzi umegharimu kiasi cha shilingi Milioni 402 ambazo ni fedha za mapato ya ndani ya Manispaa hiyo ukiwa ni mradi wa ujenzi wa jengo la ghorofa moja na hadi sasa ujenzi wake umefikia asilimia 70 na unatarajiwa kukamilika mwisho wa mwezi huu.

Huku ujenzi wa Shule ya Sekondari ya sayansi ya wasichana ya Mkoa wa Dar es salaam ikiwa imegharimu zaidi ya bilioni 5 hadi sasa ambazo ni fedha kutoka Serikali kuu na mapato ya ndani ya Manispaa hiyo ikiwa na vyumba 22 vya madarasa, bwalo 1, maabara 4, chumba kimoja cha TEHAMA, mabweni 8 yenye uwezo wa kuchukua wanafunzi zaidi ya 800, jengo 1 la utawala, nyumba 5 za walimu, kichochea taka na njia za kupita ‘walk ways’

Shule hiyo ujenzi wake umefikia asilimia 96 na hadi sasa ina jumla ya wanafunzi 298 wa kidato cha kwanza na cha tano.

Ntiruhungwa ametoa muda wa wiki moja kutokea sasa kuhakikisha mkandarasi anamaliza ujenzi wa majengo yote ya Shule hiyo.