MKURUGENZI UBUNGO AKAGUA MIRADI YA MAENDELEO

Posted on: March 4th, 2024

Mkurugenzi wa Manispaa ya Ubungo Elias Runeye Ntiruhungwa ametoa siku saba kwa mkandarasi anayejenga mabanda ya wafanyabiashara katika soko la Mabibo kukamilisha ujenzi wa mabanda hayo kwani muda wa nyongeza aliopewa  kukamilisha kazi hiyo umekwisha.

Ntiruhungwa ametoa agizo hilo tarehe 04/03/2024 wakati wa ziara ya kukagua miradi mbalimbali ya maendeleo inayotekelezwa na Manispaa hiyo, ikiwemo mradi wa uboreshaji soko la mabibo,  ujenzi wa nyumba ya Mkurugenzi wa Manispaa hiyo, ujenzi wa fremu za biashara Manzese na mwendelezo wa ujenzi wa miundombinu Shule ya wasichana ya Mkoa wa Dar es salaam (Shule ya Sekondari ya wasichana Dar es salaam)

Akiongea wakati wa ukaguzi wa miradi hiyo Ntiruhungwa amesema utekelezaji wa mradi wa ujenzi wa mabanda ya wajasiriamali katika soko la mabibo ulipaswa kuwa umekamilika hivyo mkandarasi "nakupa siku saba tu ujenzi huu uwe umekamilika ili wafanyabiashara waondokane na adha ya jua na mvua pindi wanapofanya biashara zao"

"Ikifika  jumatatu ya tarehe 11 machi mwaka huu hujamaliza kazi mradi huu nakufukuza kwenye mradi kwani kazi itakuwa imekushinda" alisisitiza Ntiruhungwa.

Uboreshaji wa soko la mabibo unagharimu kiasi cha shilingi milioni 600 ambapo ujenzi wa mifereji, barabara yenye urefu wa mita 500, ujenzi wa banda 1 umekamilika huku mabanda 2 yakiendelea na ujenzi.

Aidha, Ntiruhungwa amwagiza Kaimu Mkuu wa kitengo cha Ununuzi na ugavi kuharakisha mchakato wa upatikanaji wa vifaa kwa ajili ya kumalizia kazi kwenye mradi wa ujenzi wa shule ya wasichana ya  Mkoa wa Dar es salaam.