MKURUGENZI UBUNGO ATEMBELEA MRADI WA UJENZI WA KITUO CHA KIBIASHARA CHA KIMATAIFA

Posted on: November 15th, 2023

Mkurugenzi wa Manispaa ya Ubungo Ndg. Elias Ntiruhungwa  tarehe 15/11/2023 ametembelea mradi wa kituo cha kibiashara cha Kimataifa kinachojengwa na Kampuni ya EAST AFRICA COMMERCIAL & LOGISTICS CENTER (EACLC) eneo la Ubungo ilipokuwa stendi ya zamani ya mabasi yaendayo Mikoani na Nchi jirani.

Akiongea wakati anakagua mradi huo Ntiruhungwa ameeleza kuwa ujenzi wa Kituo hicho utagharimu Dola za Kimarekani Milioni 118 sawa na Shilingi Bilioni 294 za kitanzania na kitakuwa ni kituo kikubwa na cha kisasa Afrika Mashariki.

Ntiruhungwa ameendelea kueleza kuwa mradi huo utakuwa na jumla ya fremu za ukubwa tofauti tofauti zaidi 2000 na utazalisha ajira za moja kwa moja zaidi ya 15,000 na zisizo za moja kwa moja zaidi ya 50,000 lakini pia utaiwezesha Serikali kuongeza mapato yake.

Sambamba na hayo Ntiruhungwa ametoa wito kwa jamii hususani wafanyabiashara kuitumia fursa ya uwepo wa Kituo hicho muhimu kwao na kuwahi kupata fremu za biashara zao ambapo wafanyabiashara wakubwa na wadogo watapata fursa ya kufanya biashara ndani ya kituo hicho.

“Eneo linapojengwa kituo hiki ni eneo rafiki kwa wafanyabiashara kwani linafikika kiurahisi kutokana na uwepo wa miundombinu rafiki ya usafiri ambayo inamuwezesha mtu kufika kwa urahisi kutoka sehemu yeyote ndani na nje ya Mkoa wa Dar es salaam” aliongeza Ntiruhungwa.

Kwa upande wake Mkurugenzi wa Kampuni ya EACLC Ndg. Catty Wang amewashukuru Viongozi wa Manispaa ya Ubungo kwa ushirikiano wanaoupata kipindi chote tangu kuanza kwa mradi huo na amesema ujenzi wa mradi huo utakamilika mnamo mwezi Juni 2024 na mara moja biashara zitaanza kufanyika. 

Catty ameendelea kueleza kuwa ukamilikaji wa mradi huo utawezesha kukua kwa biashara ndogo ndogo na kupanua biashara hizo ndani ya soko kubwa la Afrika kwani watanzania watapata fursa ya kuagiza na kuuza bidhaa nje ya Tanzania. 

Ikumbukwe kuwa Manispaa ya Ubungo iliingia mkataba na Kampuni ya Shanghai Linghang group limited ambaye ni mwekezaji na Kampuni hiyo imeiteua kampuni ya EAST AFRICA COMMERCIAL & LOGISTICS CENTER (EACLC) kwa ajili ya ujenzi wa kituo hicho