MKURUGENZI UBUNGO MANISPAA AKUTANA NA WAMILIKI, WAKUU WA SHULE BINAFSI.

Posted on: July 21st, 2023

Mkurugenzi wa Halmashauri ya Manispaa ya Ubungo Ndg. Elias Ntiruhungwa amewataka wamiliki na wakuu wa Shule za Msingi na Sekondari binafsi kulipa madeni ya ada ya ushuru wa huduma “service levy” kabla ya tarehe 1 Septemba, 2023 kwa Shule ambazo zinadaiwa.

Agizo hilo amelitoa  tarehe 21 Julai, 2023 wakati wa kikao kilichofanyika katika ukumbi wa Manispaa hiyo kilichojumuisha wamiliki na wakuu wa Shule za Msingi na Sekondari za binafsi zilizopo ndani ya Manispaa hiyo.

Ntiruhungwa ameendelea kwa kusema kuwa ni jukumu la kila Shule binafsi ambayo wanafunzi wa Shule hizo wanalipa ada ili kupata huduma ya elimu kulipa ada  ya ushuru wa huduma kama ambavyo sheria inataka, na ameiagiza ofisi ya biashara kuendelea kuzifuatilia Shule hizo ili kulipa ada hiyo.

Akifafanua sheria hiyo Mwanasheria wa Manispaa hiyo Ndg. Kissah Mbila amesema ushuru wa huduma ni kodi inayotozwa kwa mujibu wa sheria No.9 ya mwaka 1982 sura ya 290 iliyofanyiwa marekebisho yake kwa sheria No 8 ya mwaka 2012 sura ya 290, ambayo inamtaka kila mfanyabiashara anaefanya biashara kulipa ushuru wa huduma ndani ya Halmashauri husika.

Kissah ameendelea kueleza kuwa sambamba na sheria hiyo, sheria ndogo ya Halmashauri hiyo ya mwaka 2022 imefafanua zaidi namna ya kulipa ada hiyo ambapo imeeleza ada ya ushuru wa huduma ni asilimia 0.3 ya mapato ghafi ya biashara husika.

“Kama Shule yako imepata jumla ya shilingi 100,000 ya mapato ghafi basi ushuru wa huduma ni shilingi 3,000 na unaweza kulipia kwa mwezi mmoja, miezi mitatu, miezi sita au mwaka mzima” Alisema Kissah.

Akiongea kwa niaba ya wamiliki na wakuu wa Shule hizo Mwalimu Mkuu wa  Shule ya Anazak Mwl. Nkuba E Msemakweli amesema wao wapo tayari kulipa ada hizo na ameomba zinaandaliwe barua za kuonesha deni la kila Shule ili malipo yafanyike.

Manispaa ya Ubungo ina jumla ya Shule za Msingi binafsi 138 na Shule za Sekondari binafsi 37 ambazo zinapaswa kulipa ada ya ushuru wa huduma.

Mkurugenzi wa Halmashauri ya Manispaa ya ubungo ELIAS NTIRUHUNGWA akitoa maelekezo kwa wamiliki wa shule za msingi na sekondari katika kikao hicho