RC ATEMBELEA UBUNGO AFANYA ZIARA YA UKAGUZI WA MIRADI

Posted on: June 27th, 2023

Mapema leo Juni 27, 2023 Mkuu wa mkoa wa Dar es Salaam Mhe. Albert Chalamila amefanya ziara ya ukaguzi wa miradi ya maendeleo katika wilaya ya Ubungo. RC Chalamila amekagua mradi wa shule ya sekondari ya wasichana ya mkoa, kituo cha mabasi cha Magufuli na mradi wa barabara ya Zege ya King'ong'o

 RC Chalamila amekagua shule ya sekondari ya wasichana ya mkoa inayojengwa katika eneo la Njeteni kata ya Kwembe ambapo ameridhishwa na maendeleo ya mradi huo na amependekeza baada ya kukamilika kwa shule hiyo ije izinduliwe na Mhe. Rais Samia Suluhu Hassan 

Katika kituo cha Mabasi cha Magufuli, RC Chalamila amekagua kituo hicho kujionea shughuli za uendeshaji. Pamoja na hilo Chalamila amesikiliza kero za wafanyabiashara wa kituo hicho ambapo wengi wamelalamikia utaratibu wa mabasi kupakia na kushusha nje ya kituo hicho. RC Chalamila amejibu hoja kwa kuomba muda wa kwenda kujiridhisha kwanini utaratibu huo haujakoma hadi sasa licha ya kulalamikiwa kwa muda mrefu, na baada ya hapo atafanya maamuzi sahihi yatakayosaidia kituo hicho na kuongeza ukusanyaji wa mapato ya serikali

Aidha katika mradi wa barabara ya Zege King'ong'o, RC Chalamila ameipongeza TARURA kwa kutekeleza mradi huo kwa ubora mkubwa na ametoa rai kwa watumiaji wa barabara hiyo kuitunza na kuienzi ili idumu kwa muda mrefu