RC CHALAMILA AFANYA ZIARA UBUNGO, ASISITIZA UCHAPAJI KAZI NA USHIRIKIANO

Posted on: May 31st, 2023

Mapema leo Mei 31, 2023 mkuu wa mkoa wa Dar es Salaam Mhe. Albert Chalamila amefanya ziara ya kutembelea Wilaya ya Ubungo kujitambulisha kwa watumishi wa wilaya na Manispaa ya Ubungo na kutoa maelekezo ya mwelekeo wake wa kiuongozi ndani ya mkoa huu 

Mhe. Chalamila amefanya ziara hiyo ndani ya Wilaya ya Ubungo kufuatia kuhamishiwa mkoa wa Dar es Salaam kutokea mkoa wa Kagera

Akitoa salamu za ukaribisho, mkuu wa wilaya ya Ubungo Mhe. Hashim Komba amempongeza Mhe. Albert Chalamila kwa kuendelea kuaminiwa na Rais Dkt. Samia Suluhu Hassan na amemuahidi ushirikiano wa kutosha pamoja na utekelezaji wa maagizo yake

Sambamba na hilo Mhe. Komba amemweleza mkuu wa mkoa kuwa Wilaya ya Ubungo imeendelea kujidhatiti kwenye utoaji huduma bora kwa wananchi na ukamilishaji wa miradi mbalimbali ya maendeleo katika sekta mbalimbali. Pia ukusanyaji wa mapato ambapo kwa mwaka wa fedha 2022/2023 Makadirio ya makusanyo ya mapato ni Bilioni 32 na mpaka sasa zimeshakusanywa Bilioni 28 sawa na asilimia 90 ya matarajio. 

Akiongea katika kikao hicho Mhe. Albert Chalamila amewataka watumishi wa umma wa Wilaya na Manispaa ya Ubungo kuweka jitihada, nidhamu, ubunifu na uvumbuzi kwenye kutoa huduma bora kwa wananchi ili kutafsiri maono ya Rais Dkt. Samia Suluhu Hassan kuwa uhalisia 

"Watumishi wa umma tuna dhamana ya Mhe. Rais hivyo tunalo jukumu la kutoa huduma bora kwa wananchi ili tujitendee haki sisi wenyewe pamoja kumtendea haki Rais wetu. Pia ushirikiano na upendo ni nguzo kubwa za kufanikisha malengo na matarajio ya wananchi kwetu sisi watumishi" alisema Chalamila 

Aidha Chalamila ameiagiza Manispaa ya Ubungo kushughulikia changamoto za makundi kama vile kundi la watu wa bajaji na makundi mengine ya wajasiriamali katika jamii juu ya changamoto zinazowakabili 

Akitoa shukrani katika kikao hicho naibu meya wa Manispaa ya Ubungo Mhe. Yusuf Yenga amemshukuru mkuu wa mkoa kwa kufanya ziara hiyo na amemhakikishia ushirikiano wa kutosha wa baraza la madiwani na Manispaa kwa ujumla katika kipindi chake cha uongozi katika mkoa wa Dar es Salaam

Mkuu wa mkoa wa dar es salaam Albert Chalamila akiongea na watumishi wa  Manispaa ya Ubungo