RC MAKALLA ARIDHISHWA NA MAENDELEO YA MRADI WA SHULE MAALUMU YA WASICHANA YA MKOA WA DAR ES SALAAM INAYOJENGWA KATA YA KWEMBE MANISPAA YA UBUNGO

Posted on: May 11th, 2023

Katika muendelezo wa ziara ya mkuu wa mkoa wa Dar es Salaam Mh. CPA Amos Makalla, mapema leo Mei 11, 2023 amefanya ziara katika shule maalumu ya wasichana ya mkoa wa Dar es Salaam inayojengwa katika eneo la Njeteni kata ya Kwembe Manispaa ya Ubungo.

Mh. Makalla amekagua mradi wote huo na ameridhishwa na maendeleo yake na kuwapongeza mkuu wa wilaya ya Ubungo, Mstahiki Meya na baraza la madiwani pamoja na mkurugenzi wa Manispaa hiyo kwa usimamizi mzuri wa Mradi huo mkubwa wa elimu

"Nawapongeza sana Ubungo siku zote mmekuwa wa kwanza kwenye usimamizi wa miradi ya maendeleo. Huu ni mradi mkubwa na wa mfano kwa mkoa wa Dar es Salaam ambapo Rais ameleta hapa fedha jumla ya shilingi Bilioni 3. Leo nimekuja kuona maendeleo yake na niseme wazi kuwa nimeridhishwa na maendeleo yake" Alisema Makalla

Mapema akieleza maendeleo ya mradi huo, Mkurugenzi wa Manispaa ya Ubungo Ndg. Beatrice Dominic amesema kuwa kwasasa mradi huo umefikia asilimia 85 na mkandarasi ameshalipwa jumla ya malipo ya asilimia 65.5 ya kazi. Na hadi kufikia mwezi Julai, 2023 Shule hiyo itaanza kupokea wanafunzi wa kidato cha tano tayari kuanza masomo.

Nae mkuu wa Wilaya ya Ubungo Mh. Hashim Komba amemshukuru mkuu wa mkoa kwa ziara yake ndani ya Manispaa ya Ubungo na amemhakikishia kuendelea kusimamia miradi mbalimbali ya maendeleo kwa kasi kubwa ili dhamira ya Rais Dkt. Samia Suluhu Hassan itimie kwa vitendo.

Aidha katika ziara hiyo pia imewasilishwa taarifa ya mpango wa kupendezesha eneo la shule hiyo (Beautification plan) ambapo itakapokamilika itaifanya shule hiyo kuwa ni shule ya mfano Dar es Salaam na Tanzania kwa ujumla