SERIKALI YAZINDUA MADAWATI YA HUDUMA ZA USTAWI WA JAMII KATIKA VITUO VYA USAFIRISHAJI.

Posted on: June 30th, 2025

Serikali kupitia wizara ya Maendeleo ya jamii, wanawake na makundi maalumu  Juni 30, 2025 imezindua Madawati ya Huduma za ustawi wa jamii katika vituo vya usafirishaji nchini pamoja na uzinduzi wa  kiongozi cha taratibu za utoaji wa huduma za kijamii kwa watoto wanaoishi na kufanya kazi mtaani.

Akizungumza wakati wa uzinduzi huo uliofanyika katika kituo cha mabasi Magufuli, Waziri wa wizara ya Maendeleo ya jamii, wanawake na makundi maalumu Mh. Dorothy Gwajima alisema lengo ni kusaidia katika utoaji wa huduma katika vituo vya usafiri, kusaidia kubaini mapema viashiria vya hatari ikiwemo ukatili, usafirishaji haramu na utoroshwaji wa watoto ili kuwaokoa kabla hawajaingia mtaani.

Alisema, Uzinduzi wa dawati hilo katika kituo cha mabasi Magufuli unafanya kuwa na jumla ya idadi ya Madawati 14 ya huduma nchini yaliyopo katika vituo vya usafirishaji kwenye mikoa 11 ikiwemo mikoa ya Tabora, Mbeya, Dodoma,  Kagera, Arusha, Morogoro, Songea, Shinyanga (2), Njombe, Mwanza (2), na Dar es Salaam. 

Alisisitiza kuwa madawati hayo yanalenga kutoa huduma za ustawi wa jamii kwa makundi maalumu ikiwa ni pamoja na kuwaokoa watoto katika vituo vya usafiri na kuonyesha viashiria vya kutelekezwa, kufanyiwa ukatili, kuingia katika ajira za watoto na kuishia mtaani.

Aidha alisema, watoto wanaoishi na kutelekezwa mitaani ni suala linalohitaji nguvu za kila sekta na wadau wote wa umma, Serikali,  na sekta binafsi, wizara za kisekta,  taasisi za serikali,  mamlaka za mikoa na serikali za mitaa, madawati ya polisi ya Jinsia,  wadau mbalimbali, viongozi wa dini, wazee wa kimila, na jamii yote kwa ujumla.

Kwa upande wake Naibu Katibu Mkuu wizara ya Maendeleo ya jamii,  jinsia na makundi maalumu Bw. Amon Anastaz Mpanju amewataka viongozi ngazi za Halmashauri kuhakikisha madawati yote ya kutolea huduma yanaimarishwa ili kuhakikisha kero na changamoto za watoto wa mitaani zinashughulikiwa kwa wakati na kupatikana kwa mrejesho haraka.