TAMISEMI, BENKI YA DUNIA WATEMBELEA MIRADI YA AFYA UBUNGO MANISPAA

Posted on: March 20th, 2023

Timu ya wataalamu kutoka benki ya dunia, Ofisi ya Rais -TAMISEMI, Wizara ya Elimu na Mafunzo ya ufundi, Ofisi ya Mkuu wa Mkoa wa Dar es Salaam pamoja na Manispaa ya Ubungo leo wametembelea shule mpya ya bweni ya wasichana ya Mkoa wa Dar es Salaam inayojengwa mtaa wa Njeteni katika Kata ya Kwembe Manispaa ya Ubungo.

Shule hiyo ambayo ujenzi wake ulianza mwezi Mei mwaka jana 2022 na unategemewa kukamilika mwezi Aprili 2023, hadi sasa umefikia hatua nzuri na ujenzi wake bado unaendelea. Ambapo sehem kubwa ya ujenzi wa shule hiyo umekamilika, Madarasa, Maabara na Mabweni ujenzi wake umekamilika na pia baadhi Nyumba za Walimu zimekamilika. Huku bwalo la chakula na jengo la utawala ujenzi wake ukiwa bado unaendela.

Wakati huo huo timu hiyo imetembelea shule ya Msingi Kibamba iliyopo kata ya Kibamba ili kujionea eneo lililopendekezwa kwaajili ya ujenzi wa shule mpya ya Msingi. Hii ni kutokana na msongamano mkubwa wa Wanafunzi Darasani katika Shule hiyo, ambapo Darasa moja linakuwa na Wanafunzi 100 hadi 120.

Akilizungumzia hilo Afisa Elimu wa Mkoa wa Dar es Salaam Bw. Maulid Abdul amesema "msongamamo huo unatokana na kuhama makazi kutoka mjini kuja pembezoni mwa mji na hii kutokana na maeneo mengi ya mjini kwasasa kuwa ni maeneo ya kibiashara"

Timu hiyo pia iliweza kutembelea shule ya Sekondari Msakuzi iliyopo kata ya Mbezi Manispaa ya Ubungo ambayo ni shule mpya. Shule hiyo kwa kiasi kikubwa ujenzi wake umekamilika na wanafunzi wapo Darasani wanaendelea na masomo.

Kwasasa shule hiyo ina wanafunzi wa kidato cha kwanza tu na jumla yao ni 296

Naye Afisa elimu sekondari wa Manispaa hiyo Bw. Vosta Mgina alishukuru na kuongeza kuwa eneo ilipojengwa shule hiyo ya sekondari lilitolewa na mwananchi kama mchango wao kwa jamii ili watoto wa eneo hilo kuwapunguzia umbali kwenda shule, ambapo hapo awali ilikuwa ni changamoto sana kwa watoto wa eneo hilo. Na pia aliishukuru serikali ya awamu ya sita chini ya Rais Dkt. Samia Suluhu Hassani kwa jitihada anazofanya kuhakikisha watoto wa kitanzania wanapata elimu katika mazingira bora

@ortamisemi

@worldbank