TUSAFISHE MITARO,TAHADHARI YA EL-NINO

Posted on: September 30th, 2023

Wilaya ya Ubungo tarehe 30/09/2023 ikiwa ni Jumamosi ya mwisho wa mwezi imefanya usafi ndani ya Kata ya Makurumla ndani ya mto china huku ikiendelea kuiishi kwa vitendo kampeni ya usafi ya “kataa uchafu; safisha pendezesha Ubungo (KAU;SAPEU)” yenye lengo la kuhamasisha usafi wa mazingira kwenye maeneo mbalimbali ya Wilaya hiyo.

Akiongea katika usafi huo Mhe. Hashim Komba Mkuu wa Wilaya hiyo amesema mara nyingi tumekuwa tukiishi kampeni ya KAU;SAPEU kwa kufanya usafi kwenye maeneo mbalimbali na leo ni vyema kufanya usafi kwenye eneo hili la mto china kwani mamlaka ya Hali ya hewa imeshatangaza uwepo wa mvua za elnino hivyo kwa kusafisha mto huu tutasaidia kujiepusha na mafuriko kutokana na mvua hizo.

Mhe. Komba ameiagiza Manispaa hiyo kuhakikisha mto huo unasafishwa vyema ili kuwezesha wananchi kuepukana na mafuriko kutokana na mvua zilizotabiriwa kunyesha na amewataka wananchi kuacha kutupa taka ndani ya mto huo na kuacha kuziba njia za maji.

“Rai yangu kwenu wananchi wote na viongozi kwa ujumla tuchukue tahadhari zote muhimu kutokana na uwepo wa mvua hizo kwa kipindi chote cha kuanzia sasa hadi machi kama ambavyo tumetangaziwa sasa tuanze kusafisha mito yote, mitaro ya maji yote na njia zote za maji” alisisitiza Komba.

Kwa upande wake Mhe Bakari Kimwanga Diwani wa Kata hiyo amemshukuru Mkuu wa Wilaya hiyo kuja kushiriki usafi ndani ya Kata hiyo na ameahidi kuwa Kata yake itakuwa ya mfano kwenye suala la usafi na elimu ya usafi wa Mazingira itaendelea kutolewa kwa wananchi na hivyo Kata hiyo itaongoza juu usafi wa mazingira kupitia kampeni ya KAU;SAPEU.

Kampeni hiyo inatekelezwa kwa ukaguzi unaofanywa na Kitengo cha mazingira cha Wilaya hiyo ambapo Mtaa utakaofanya vizuri utapatiwa pikipiki mbili na utakaofanya vibaya utapewa bendera itakayoandikwa kinara wa uchafu Ubungo.