TUWEKEZE KWENYE UPENDO KUTOKOMEZA UKATILI

Posted on: March 20th, 2024

"Mpaka sasa Manispaa ya ubungo tumetoa elimu ya kukabiliana na ukatili wa kijinsia katika shule za msingi 20, na shule za sekondari 19. Yote hii ni jitihada ya kuhamasisha jamii kuwekeza katika upendo na kuendelea kutoa elimu kwa jamii nzima ili tutokomeze tatizo hili ili kutengeneza jamii bora na salama"

Hayo yamesemwa na mratibu wa dawati la jinsia Manispaa ya Ubungo Ndg. Hilda Malosha alipokua akifungua kikao kazi cha masuala ya ukatili wa kijinsia mapema leo Machi 20, 2024 katika ukumbi wa Manispaa ya Ubungo ambapo kikao hicho kimehudhuriwa na wadau mbalimbali ikiwemo madiwani wanawake wa Manispaa ya Ubungo, dawati la jinsia kutoka jeshi la polisi, maafisa maendeleo, maafisa ustawi wa jamii pamoja na asasi za kiraia

Kikao kazi hicho kimekuja mahususi kwaajili ya kushirikiana kwa pamoja kujadili suala hilo la ukatili wa kijinsia pamoja na kuweka mikakati zaidi ya ni njia zipi za kutumika ili kukabiliana na vitendo vyote vya ukatili wa kijinsia katika jamii zetu ili kutengeneza jamii bora na taifa imara

Awali akichangia mada Joyce Mapunda kutoka dawati la jinsia kutoka mkoa wa kipolisi Kimara, ameeleza namna ambavyo tatizo hilo linaendelea kukua kwa kasi katika jamii zetu ambapo vitendo vya watoto wa kike na wanawake kufanyiwa vitendo vya kunyanyaswa ikiwemo kupigwa, au kufanyiwa vitendo vya mapenzi kinyume na maumbile pamoja na tatizo la watoto wa kiume kulawitiwa na watu mbalimbali ikiwemo watu wao wa karibu kama wazazi na walezi

Nae diwani wa viti maalumu Manispaa ya Ubungo Mhe. Mary Mwamfupe amesema kuwa suala la ukatili katika jamii zetu linakua kwa kasi sana na ufumbuzi wake bado ni kitendawili. Ametoa rai kwa wadau, maafisa maendeleo na maafisa ustawi kushuka chini kwenye jamii kupitia vikundi vya vikoba na vikundi vingine kupeleka elimu juu ya kuliokoa taifa dhidi ya vitendo hivyo

Akiwakilisha asasi za kiraia Bi. Joyce Augustino kutoka asasi ya Women and Youth Initiative (WYI) ameeleza kuwa katika jamii tatizo la ukatili wa kijinsia linaathiri zaidi wanawake hivyo amewaomba wadau kuunganisha nguvu kukabiliana na tatizo hilo pamoja na kuhamasisha wananchi kutoa taarifa za ukatili wa kijinsia unaotokea katika jamii zao kuanzia ngazi ya familia