UBUNGO IMEWAJENGEA UWEZO WATENDAJI WA KATA NA MITAA KUHUSU MFUMO WA ANUANI ZA MAKAZI

Posted on: February 20th, 2022

Manispaa ya Ubungo leo tarehe 20.2.2022 imefanya kikao kilichohusisha watendaji wa kata na mitaa ili kuwajengea uwezo juu ya mfumo wa anuani za makazi lengo ikiwa ni kuwapa uelewa wa pamoja na kuonesha mwelekeo na matarajio ya  serikali kuhusu anuani za makazi.

Akiongea Mkurugenzi wa Manispaa hiyo Beatrice Dominic wakati akifungua mafunzo hayo amesema zoezi la anuani za makazi ni zoezi muhimu na linapaswa kufanyika kwa umakini na amewataka viongozi hao kukamilisha zoezi kwa muda uliokusudiwa ambapo ameeleza kwa Ubungo zoezi hilo litafanyika kwa siku 45 tu.

Aidha Beatrice amewataka watendaji wa kata na mitaa kwenda kusimamia zoezi hilo kwa ufanisi na kutoa ushirikiano ipaswavyo hili kukanilisha zoezi hili na wakawe makini kwa maana ya kuepusha migogoro ya mipaka baina ya mtaa  na mtaa.

Akiongea mwezeshaji ndugu Ally Mohamed amesema anwani za makazi zinajumuisha namba ya anwani ya jengo au kiwanja, jina la barabara au mtaa na postikodi, ambapo ameeleza utoaji wa majina ya barabara unapaswa kuzingatia vigezo vifuatavyo; historia ya eneo, jina la mtu kwa maana ya kumuenzi, matamshi yenye maadili, kuzingatia sheria mbalilmbali na kutokuwa na ukabila, udini na usiasa.

Nae mratibu wa zoezi hilo Manispaa ya Ubungo John Ilomo ameeleza kuwa kwa mujibu wa mwongozo wa namba za anwani uanza kuwekwa kutokea mwanzo wa barabara hadi mwisho wa barabara kwa kuzingatia idadi ya watu kutoka kwenye wakazi wengi kwenda kwenye wakazi wachache ambapo upande wa kulia ni namba shufwa na kushoto namba witiri lengo ni kurahisi utambuzi.

Aidha wawezeshaji hao wameeleza umuhimu wa anuani za makazi ni; kuwezesha kufanyika kwa biashara mtandao, kuimarisha ulinzi na usalama, kuwezesha ukusanyaji wa mapato, kurahisisha shughuli za tafiti na upatikanaji wa taarifa, kuongeza ajira na kuboresha upataji, utoaji na upatikanaji wa huduma na bidhaa hadi mahali stahiki.