UBUNGO, KISARAWE WAKUTANA KING’AZI KUTATUA MGOGORO

Posted on: September 9th, 2023

Kufuatia mgogoro wa mpaka katika Mtaa wa King’azi A kata ya Kwembe, Wakuu wa Wilaya za Ubungo na Kisarawe wameunda timu maalumu inayojumuisha wataalam na wananchi wa pande zote mbili kwa ajili ya kupata uelewa wa pamoja kuhusu mipaka ya eneo hilo ambalo limekuwa na migogoro mingi ya ardhi kwa kisingizio cha mipaka ya eneo hilo.

Uundaji wa timu hiyo ni moja ya maazimio yaliyotolewa na wakuu hao wa wilaya septemba 9, 2023 kwenye mkutano wa wananchi wa mtaa huo ukilenga kusikiliza maoni ya wananchi juu ya mgogoro wa mipaka uliopo katika mtaa huo ambapo wanachi hawaelewi kama wanahudumiwa na ipi kati ya Ubungo na Kisarawe ili kuondoa mikanganyiko iliyopo sasa.

Akiongea wakati wa mkutano huo, Mkuu wa Wilaya ya Ubungo Hashimu Abdallah Komba amewaeleza wananchi kuwa timu hiyo itajumuisha wataalamu na wananchi 8 kutoka pande zote mbili lengo ikiwa ni kujiridhisha na kupata uelewa wa pamoja kuhusu mipaka ya mtaa huo kwa mujibu wa tangazo la Serikali (GN) ya awali ya mwaka 1974 na marekebisho GN ya mwaka 2019 ili kuondoa utata uliopo sasa lakini pia wananchi kujua wanahudumia na mamlaka ya utawala wa Wilaya ipi.

“Hii timu itafanya kazi kwa muda wa wiki tatu na baada ya hapo utaitishwa mkutano wa wananchi kwa ajili ya kupata mrejesho na kutoa maamuzi kuhusu mipaka ya eneo na hivyo tunaamini mgogoro huu tutakuwa tumeumaliza na wananchi mtaendelea kufurahia maisha kwa kufanya shughuli zenu za maendeleo kwa uhuru na Amani” alieleza Mhe. Komba.

Pamoja na kuunda timu hiyo maalumu, Mhe. Komba amewataka wananchi washikamane na kushirikiana  kwani wao ni wamoja badala ya kutenganishwa na migogoro ya mipaka kwani inaweza kubadilishwa wakati wowote kulingana na ongezeko la watu, hivyo tusigombane kwa ushawishi wa watu wachache wenye maslahi yao binafsi

Kwa upande wake Mkuu wa Wilaya ya Kisarawe Mhe. Fatma Almasi Nyangasa aliwaeleza wananchi kuwa katika kipindi hiki cha Mtaa wa king’azi wenye mgogoro utahudumiwa na wenyeviti wawili wa king’azi na Kisopwa mpaka pale mgogoro utakapotatuliwa, aidha amewaonya wenyeviti hao kutojihusisha na uuzaji wa ardhi kwani hicho ndio chanzo kikubwa cha mgogoro huo uliopo sasa.