UBUNGO KUJA NA ELIMU YAMLIPA KODI

Posted on: November 6th, 2023

Ofisi ya Mkuu wa Wilaya ya Ubungo  kwa kushirikiana na ofisi ya Manispaa ya Ubungo wanatarajia kuandaa na kutekeleza mpango mkakati wa pamoja wa ukusanyaji wa mapato utakaoambatana na utoaji wa elimu kwa mlipa kodi ili kufikia lengo la kukusanya 50% ya mapato katika kipindi cha robo ya pili kinachomalizika mwezi desemba 2023.

Uamuzi huo umetolewa na Mkuu wa Wilaya ya Ubungo Mhe. Hashimu Komba kwenye kikao cha mapato kilichofanyika novemba 06, 2023 kilicholenga kufanya tathmini ya ukusanyaji wa mapato katika Manispaa hiyo ambapo kwa kipindi cha robo ya kwanza ilikusanya mapato yake  kwa 23% badala ya 25% iliyokuwa inatakiwa.

Akiongea kwenye kikao hicho, Mhe. Komba amesema kuwa timu hiyo itajikita zaidi kukusanya vyanzo vikubwa vya mapato ikiwemo ushuru wa Huduma, leseni za biashara , vibali vya ujenzi  na wadaiwa sugu (defaulters)  wakiwemo wa  leseni za biashara, ushuru wa huduma ili kuhakikisha mapato yanakusanywa kikamilifu.

Ili kutekeleza zoezi hilo kikamilifu Mhe.Komba ameiagiza menejimenti kuandaa kanzidata ya takwimu ya kila chanzo kwa ajili ya  kurahisisha ukusanyaji wa mapato kwani takwimu zitaonesha ukubwa wa kazi na uwekezaji wa nguvu katika ukusanyaji.

"Andaeni takwimu  halisi za Maduka, hotel, nyumba za kulala wageni, mabango, fremu za maduka, vizimba na wadaiwa sugu ili kujua tunapaswa kukusanya kiasi gani kwenye kila chanzo na kazi hii ifanyike haraka" aliagiza DC Komba

Aidha, pamoja na mkakati huo DC Komba amewataka mameneja wa vyanzo vya mapato katika Manispaa hiyo kuacha kufanya kazi kwa mazoea badala yake wawe wabunifu na kuhakikisha vyanzo wanavyosimami  vinakusanya mapato kwa asilimia 100 kwani hakuna sababu ya kutofikia lengo.

Nae Mkurugenzi wa Manispaa hiyo Ndg Elias Ntiruhungwa amemshukuru DC Komba kwa kikao hicho na kuahidi kuwa kwa kipindi cha robo ya pili kinachoishia mwezi disemba,Manispaa itafikia lengo la kukusanya asilimia 50 ya bajeti bila wasiwasi.

Kwa kipindi cha robo ya kwanza yaani kuanzia mwezi julai hadi Septemba Manispaa ya Ubungo imekusanya kiasi cha bilioni 7.9 kati ya bilioni 35.2 zilizopangwa kukusanywa kwa mwaka wa fedha 2023/ 2024.

pichani ni wajumbe wa kikao wakijadili namna bora ya itakayosaidia kuongezeka kwa  mapato