UBUNGO YAADHIMISHA SIKU YA USAFI WA MAZINGIRA DUNIAN

Posted on: September 16th, 2023

Manispaa ya Ubungo tarehe 16 Septemba, 2023 imeadhimisha siku ya usafi duniani kwa kufanya usafi wa mazingira ya soko la Mabibo maarufu kama soko la ndizi

Maadhimisho hayo yameenda sambamba na kauli mbiu isemayo “Tuungane pamoja, kujifunza, kupanga na kuhimiza uimarishaji na udhibiti wa taka” na usafi huo umefanywa na wadau mbalimbali ikiwemo Green awereness club, Suma JKT, wananchi ambao ni wajasiriamali wa soko hilo pamoja na viongozi mbalimbali.

Akiongea wakati wa usafi huo Mhe. Juma Jaffery Nyaigesha ameeleza kuwa Manispaa ya Ubungo imeendelea kuhakikisha maeneo yote yanakuwa safi na katika kuhakikisha hili linawezekana imeweka mikakati madhubuti ya utunzaji wa mazingira ikiwemo na Kampeni ya usafi wa mazingira ijulikanayo kama “kataa uchafu; safisha pendezesha Ubungo”

Mhe. Nyaigesha ametoa rai kwa wajasiriamali wa soko hilo sambamba na wananchi wote wa Manispaa hiyo kuhakikisha maeneo yao yanakuwa safi muda wote na kuendelea kutunza miundombinu ya soko hilo ambayo inaendelea kuboreshwa na Manispaa hiyo ili kuwezesha mazingira bora ya kufanya biashara.

Kwa upande wake Meneja wa soko hilo Samuel Lugala ameeleza kuwa Manispaa ya Ubungo imetoa kiasi cha shilingi milioni 600 kwa ajili ya maboresho ya soko na amewataka wajasiriamali wa sokoni hapo kuendelea kushirikiana vyema na Manispaa ili kutunza miundombinu hiyo na mazingira yake huku elimu ya utunzaji wa mazingira ikiendelea kutolewa.

Nae Kelvin Marwa Mwenyekiti wa klabu ya Green awereness amesema klabu hiyo inajishughulisha na utoaji wa elimu ya utunzaji wa mazingira, matumizi ya nishati mbadala na upandaji wa miti kwenye Shule mbalimbali za msingi za sekondari pamoja na vyuoni.

Marwa ameendelea kueleza kuwa sambamba na kutembelea Shule na Vyuo mbalimbali bado klabu hiyo imekuwa ikishirikiana na jamii kwa kufanya usafi kwenye maeneo mbalimbali, kupanda miti na kuielekeza jamii kutumia uchafu wa mabaki ya chakula kutengeneza mbolea pamoja na kutumia maboksi kutengenezea mkaa mbadala.

wananchi waliojitokeza katika zoezi la usafi wakifanya usafi katika soko la Mabibo