UBUNGO YAANZA OPERESHENI YA KUTHIBITI MBWA WANAOZURURA MTAANI KIHOLELA.

Posted on: April 16th, 2025

Halmashauri ya Manispaa ya Ubungo April 16, 2025 imeanza rasmi operesheni ya siku tano ya ukamataji na uuaji wa mbwa wanao zurura mtaani wasiokuwa na makazi maalumu ambao wamekuwa wakisababisha vifo, majeraha na uharibifu wa mali kwa wananchi.

Zoezi hilo linafanyika Katika maeneo mbalimbali ya Kata za Manispaa ya Ubungo kwa lengo la kupunguza idadi ya mbwa wanao zagaa mtaani na kusababisha kero kwa jamii lakini pia kutokomeza maambukizi ya kichaa cha mbwa kwa binadamu.

Mkuu wa Idara ya Kilimo, Mifugo na Uvuvi Halmashauri ya Manispaa ya Ubungo Bw. Archie Mntambo ameeleza kuwa zoezi hili ni muhimu kwani malalamiko yamekuwa mengi kutoka kwa Wananchi kuhusu madhara yatokanayo na mbwa hawa hasa majira ya Usiku, kukosa mahali rasmi pa kuishi, na kukosa huduma muhimu kama vile chanjo za mara kwa mara.

Amesema oparesheni hii imeanzishwa ili kupunguza athari zinazoweza kutokea pale mbwa anapo mng'ata  binadamu lakini pia kudhibiti kuzaliana kwa mbwa hivyo kupelekea mbwa wazururaji kuongezeka.

Kwa upande wake Mkuu wa Kitengo George Katua amesema ‘kwa muda mrefu  kumekuwa na malalamiko kutoka kwa wananchi kuwa mbwa wamekuwa wakiwasumbua hasa nyakati za asubuhi na jioni na kusababisha wanafunzi kusumbuliwa hivyo kupelekea kuwa kero kubwa katika jamii hususani maeneo yenye idadi ya wakazi wengi.

"Ni vyema idadi ya Mbwa hawa ikapunguzwa kwa ajili ya usalama wa Wananchi na mali zao"~ Amesema Katua.

Aidha amewataka wale wote wanaofuga Mbwa kuhakikisha mifugo yao inafungiwa ndani ya mabanda lakini pia wazingatie ratiba ya chanjo ambazo zimekuwa zikitolewa mara  kwa mara kwenye kila mtaa ili kuzuia athari zinazoweza kujitokeza.

Baadhi ya Wananchi  walioshuhudia oparesheni hiyo wameishukuru na kuipongeza Serikali ya Awamu ya sita kwa kuliona hilo wakisema inasaidia kupunguza madhara yaliyokuwa yanajitokeza kutokana na Mbwa hao.