UBUNGO YAONGEZA TABASAMU KWA AKINA MAMA.

Posted on: March 5th, 2024

Kuelekea maadhimisho ya siku ya wanawake duniani ambayo huadhimishwa kila tarehe 08 March kwa kila mwaka leo tarehe 05/03/2024 Manispaa ya Ubungo kupitia Idara ya Maendeleo ya Jamii imeongeza furaha kwa akina mama waliokuwa wodi ya wazazi Hospitali ya Sinza Palestina ndani ya Manispaa hiyo kwa kuwapatia zawadi mbalimbali lengo ikiwa ni kuwaongezea tabasamu akina mama hao.

Kwa mwaka huu 2024 Maadhimisho hayo yanaenda sambamba na kaulimbiu isemayo “wekeza kwa mwanamke kwa maendeleo ya Taifa na ustawi wa jamii”

Akiongea wakati wa kukabidhi zawadi hizo kwa akina mama hao Mratibu wa Dawati la Jinsia wa Manispaa hiyo Hilda Malosha amesema Manispaa kwa kushirikiana na wadau mbalimbali wa asasi za kiraia wamepanga kutoa zawadi kwa akina mama hao ikiwemo taulo za watoto na sabuni ili kuwaongezea furaha na kuonesha kuwa pamoja nao.

“Kwa kuthamini nafasi ya mama katika jamii na katika kuelekea siku muhimu ya akina mama tumeona leo tuje kuwaongezea furaha kwa kuwapatia zawadi hizi chache  kwani tunaamini mama akiwa imara jamii pia itaimarika tunawakumbusha leo kuwa walezi wazuri kwa watoto ili kuwa na jamii imara” Alisisitiza Malosha.

Kwa upande wake Mhe. Mary Mwamfupe Diwani wa viti maalumu wa Manispaa hiyo amewataka akina mama hao kuwa walezi bora kwa watoto kwa kuhakikisha wanapata malezi bora.

Akishukuru baada ya kupokea zawadi hizo Paulina Christopher amesema imekuwa ni furaha kwao kupokea zawadi hizo na ameipongeza Manispaa hiyo kwa kuona umuhimu wa kuwaongezea furaha kutokana na zawadi hiyo.

Sambamba na kutoa zawadi kwa akina mama hao Manispaa hiyo ilitoa zawadi ya taulo za kike kwa mabinti wa Shule ya Msingi Mshikamano yakiwemo madawati na kalamu.