UBUNGO YAPOKEA MILIONI 90 UBORESHAJI WA MADARASA

Posted on: October 10th, 2023

Mkurugenzi wa Manispaa ya Ubungo Ndg. Elias Ntiruhungwa akiongozana na watalaam amefanya ziara ya ukaguzi wa ujenzi wa mradi Shule ya Sekondari ya Ubungo NHC na maboresho ya Soko la Ndizi Mabibo ikiwa ni mwendelezo wa kufanya ufuatiliaji wa utekelezaji wa miradi hiyo na kuhakikisha inakamilika kwa wakati

Akiongea wakati wa ukaguzi huo Ntiruhungwa ameridhishwa na kasi ya utekelezaji wa miradi hiyo na amesisitiza kasi hiyo iendelee ili  dhamira ya serikali ya kukamilisha miundombinu  hiyo kwa wakati itekelezwe kwa vitendo.

Miradi hiyo iliyokaguliwa Oktoba 10,2023  ipo katika hatua ya umaliziaji ambapo kwa upande wa ujenzi wa banda katika Soko la Mabibo kazi inayoendelea ni kuezeka au kupiga bati na baada ya hapo wafanyabiashara wataanza kutumia banda hilo.

Aidha, katika mwendelezo wa uboreshaji wa miundombinu ya elimu,  Ntiruhungwa amesema Manispaa ya Ubungo imepokea fedha shilingi milioni  90 kwa ajili ya uboreshaji wa miundombinu ya madarasa katika shule ya msingi NHC ili kuwa na mazingira bora ya ufundishaji na ujifunzaji.

Mradi wa ujenzi wa shule ya sekondari NHC kwa mfumo wa ghorofa  unagharimu shilingi 877,098,112.07  huku milioni 600 zinatumika  kwenye uboreshaji wa soko la Ndizi Mabibo kwa awamu ya kwanza

Mkurugenzi manispaa ya Ubungo Elias Ntiruhungwa akiwa na wataalam katika ukaguzi wa miradi