UBUNGO YASAINI MKATABA WA MILIONI 646

Posted on: December 27th, 2023

Manispaa ya Ubungo tarehe 27/12/2023 imesaini mkataba wenye thamani ya Shilingi Milioni 646 kwa ajili ya ujenzi wa uboreshaji wa miundombinu ya Kituo cha afya cha Kimara inayojengwa na Kanisa la Yesu Kristo la watakatifu wa siku za mwisho Dar es salaam.

Usainishaji huo umetokana na msaada uliotolewa na Kanisa hilo wa uboreshaji wa Kituo cha Afya Kimara ambapo maboresho mbalimbali yatafanyika ikiwemo ujenzi wa ghorofa ya pili, kufunika ngazi na kuweka mifumo ya umeme na maji taka na Zahanati ya Makuburi maboresho mbalimbali yatafanyika ikiwemo njia ya kupitia wagonjwa, kichomea taka na vifaa vyake, tanki la maji na mnara wake, mashimo ya maji taka na shimo la kuhifadhia taka.

Akiongea Rais wa Kanisa hilo Juventus Rubonaameipongeza Serikali ya awamu ya sita chini ya uongozi wa Rais Dkt. Samia Suluhu Hassan kwa kuendelea kutoa huduma mbalimbali muhimu kwa wananchi na hivyo kanisa hilo kuamua kuunga mkono juhudi hizo na kuamua kutoa misaada mbalimbali kwa jamii.

Rubona ameendelea kueleza kuwa Kanisa hilo limepanga kutoa misaada mbalimbali kwa Manispaa hiyo na kwa mwaka wa fedha ujao limepenga kuboresha masuala mbalimbali ya sekta ya elimu katika Shule za Msingi ndani ya Manispaa hiyo.

Kwa upande wake Mkurugenzi wa Manispaa hiyo Elias Ntiruhungwa amelishukuru kanisa hilo kwa msaada huo kwa awamu ya pili ambapo hapo awali liliboresha miundombinu ya ujenzi wa madarasa katika Shule ya Msingi Kibamba na ujenzi wa ghorofa ya kwanza katika Kituo cha afya cha Kimara.

Ntiruhungwa ameeleza kuwa misaada hiyo ina tija kubwa kwa Manispaa na wananchi kwa ujumla kwani hadi sasa kuna wanafunzi zaidi ya elfu 6 wanaotarajiwa kuanza kidato cha kwanza kwa mwaka 2024 huku Manispaa hiyo ikiwa na upungufu wa madawati zaidi ya elfu 11 hivyo ametoa wito kwa wadau wengine kuendelea kutoa misaada mbalimbali kwa lengo la kuwezesha wananchi kuendelea kupata huduma bora za kijamii.

Nae Mstahiki Meya wa Manispaa hiyo Mhe. Japhary Nyaigesha akilishukuru Kanisa hilo amesema Manispaa inaona fahari namna ambavyo wadau mbalimbali wanavyoguswa katika kuisadia Serikali juu ya uboreshwaji wa miundombinu mbalimbali ambayo kwa kiasi kikubwa inasaidia kugatua huduma kwa wananchi