UBUNGO YATEKELEZA MPANGO WA MBOLEA YA RUZUKU.

Posted on: November 17th, 2023

Halmashauri ya Manispaa ya Ubungo ni miongoni mwa Halmashauri zinazotekeleza mpango wa ruzuku ya mbolea kwa msimu wa 2022/2023 na 2023/2024 kupitia idara ya kilimo, mifugo na uvuvi.

 tarehe 17/11/2023 imefanya kikao cha kujadili taarifa ya tathimini ya utekelezaji wa mpango wa ruzuku ya mbolea kwa mwaka wa fedha 2022/2023 hadi 2023/2024 kilichojumuisha maafisa Kilimo wa Manispaa hiyo, Maafisa wa Mamlaka ya udhibiti wa mbolea Tanzania ‘TFRA’ na Maafisa kutoka Taasisi ya kuzuia na kupambana na rushwa ‘TAKUKURU’ na wakulima mbalimbali.

Akiongea Mratibu wa Pembejeo Manispaa ya Ubungo Msafiri Barnabas amesema kwa mwaka wa fedha 2022/2023 Manispaa ya Ubungo imefanikiwa kusajili jumla ya wakulima 469 sawa na 20.52% kwenye mfumo wa ruzuku na wakulima 540 kwa mwaka wa fedha 2023/2024 sawa na 23.63% kati ya wakulima 2285 wa Manispaa hiyo.

Msafiri ameendelea kueleza kuwa Serikali imepanga kutoa ruzuku ya mbolea kwa wakulima kwa lengo la kupunguza gharama ya mbolea kwa wakulima ili kuongeza uzalishaji na tija katika kilimo, kuimarisha usalama wa chakula na kuongeza upatikanaji wa malighafi za viwanda vya ndani.

Sambamba na hayo Msafiri ameeleza kuwa mbolea zitakazohusika kwenye ruzuku ni mbolea za kupandia na kukuzia zikiwemo DAP, UREA, SA, CAN, NPKs, NITRABO na aina zingine kulingana na mahitaji ya soko.

Kwa upande wake Kaimu Meneja wa TFRA kanda ya Mashariki Ndg. Alla Mariki ametoa wito kwa wakulima kujisajili kwenye mfumo wa mbolea za ruzuku, ili kuiwezesha Serikali kupunguza mianya ya rushwa  na mfumo huo utatumia program maalum ya Kidijitali kusajili wakulima, wasambazaji/wazalishaji, mawakala pamoja na kuratibu usambazaji wa mbolea kwa wakulima na malipo ya mbolea ya ruzuku.

Aidha, Mariki amewataka wakulima kuacha kuuza mbolea za ruzuku kwani kufanya hivyo ni kinyume na taratibu za muongozo wa mbolea za ruzuku Nchini.

Nae Afisa wa TAKUKURU Wilaya ya Ubungo Ndg. Peter Mtema ameitaka Manispaa hiyo kuhakikisha elimu ya mbolea ya ruzuku inazidi kutolewa ili kuwezesha wakulima wengi kuweza kujisajili kwenye mfumo, Kutafuta wakala wa usambazaji wa mbolea ya ruzuku ndani ya Manispaa hiyo.