UZINDUZI WA ZOEZI LA UPIMAJI WA AFYA BURE KIMKOA WAFANYIKA UBUNGO

Posted on: June 20th, 2024

Zoezi la upimaji wa Afya bila malipo rasmi limezinduliwa Ubungo katika uwanja wa barafu uliopo Mburahati kuanzia  tarehe 20/6/2024 na Kampeni hiyo imeenda sambamba na kauli mbiu isemayo "Pima Afya yako kwa uhakika wa kesho yako"

Kampeni hiyo kwa Ubungo itafanyika kwa muda wa siku mbili kuanzia Leo na kumalizika kesho tarehe 21/6/2024 na kuendelea katika Wilaya nyingine Lengo likiwa  ni kuwapa fursa Wana Dar es salaam kupima magonjwa yanayoambukiza na yasiyo ambukiza bila ya malipo yoyote pamoja na utoaji wa elimu ya masuala mbalimbali ya Afya.

Akizindua zoezi hilo Katibu Tawala wa Mkoa wa Dar es salaam Dkt. Toba Nguvila amesema kuwa,  kampeni hiyo ni ya siku 10 na imezinduliwa Leo kimkoa katika Wilaya ya Ubungo na zoezi hilo litaendelea katika ngazi zote za Wilaya Mkoa wa dar es salaam kwa muda wa siku mbili kwa kila Wilaya 

Nguvila ameendelea kueleza kuwa, Kampeni hii imelenga kuwajengea utamaduni watanzania wote kuwa na tabia ya kupendelea kupima magonjwa mbalimbali  mara kwa mara jambo ambalo litawasaidia watu wengi kutambua endapo anachangamoto yoyote ili aweze kuchukua hatua za haraka za kupata matibabu

Aliendelea kuwasisitiza wananchi kupima magonjwa kupitia kampeni hii kwani ni rahisi na bila malipo na huduma za afya zinazotolewa ni kuanzia ngazi ya Msingi hadi ubobezi

Aidha, Nguvila amesema kuwa, katika zoezi hilo huduma mbalimbali zitatolewa ikiwemo uchunguzi  magonjwa ya Afya ya akili, kinywa na meno, moyo, magonjwa ya kina mama na watoto, utoaji wa chanjo, saratani ya shingo ya kizazi, tezi dume, ushauri wa kisaikolojia,upimaji na ushauri wa lishe na magonjwa yasiyoambukiza, VVU  na utoaji wa elimu ya Afya 

Na pia Nguvila amewakabidhi vyeti vya pongezi wadau walioshiriki katika uandaaji wa zoezi hilo wakiwemo JKCI, MDH, OCEAN ROAD HOSPITAL, AMRIF, BARIKI PHARMACY, AFYA CHECK, MASSANA HOSPITAL, INTERNAL HIGH CLINIC n.k

Nae Mganga Mkuu wa Mkoa Mohamed Mang'una amesema kuwa zoezi hilo lina lenga kuwasaidia wananchi wa Mkoa wa Dar es salaam kwa kupima magonjwa mbalimbali bila ya malipo