VIJANA 100 KUJIAJIRI KUPITIA KILIMO CHA KISASA

Posted on: November 15th, 2021

Vijana 100 kutoka kata 14 za Manispaa ya Ubungo wanapatiwa mafunzo ya kutengeneza na kutumia kitalu nyumba eneo la shamba darasa lilipo Mtaa wa kibesa Kata ya mbezi   ikiwa njia ya kuzalisha ajira Kwa Vijana hao

Mafunzo hayo yanayoratibiwa na Ofisi ya Waziri Mkuu,kazi Vijana,ajira na Wenye ulemavue kwa kushirikiana na wataalamu kutoka chuo kilimo cha Sokoine  yanalenga kufundisha Jamii hasa Vijana ujuzi wa namna ya kujenga vitalu nyumba na kulima Kwa kutumia teknolojia ya kitalu nyumba kama fursa ya kupata ajira kupitia ujuzi huo.

Mradi huo ni sehemu ya utekelezaji wa mkakati wa Serikali katika kutatua changamoto za ajira Kwa Vijana na kuboresha kipato kwa watanzania.

Akizungumza wakati wa kufungua mafunzo hayo Diwani wa Kata ya Mbezi Mheshimiwa Ismail Lyangama  Malata ameishukuru Serikali kwa mafunzo hayo kwa Vijana,    pia ameipongeza Manispaa ya Ubungo Kwa kutumia milioni 32  fedha za mapato ya ndani kuchimba kisima Kwa ajili ya kuwezesha kilimo cha umwagiliaji katika mradi huo.

Mwakilishi kutoka  Ofisi ya Waziri Mkuu  alisema kuwa Mafunzo hayo ya kujenga uwezo Kwa Manispaa ya Ubungo yatatolewa Kwa awamu mbili ambapo awamu ya Kwanza itahusisha Vijana 20 watakaojifunza kutengeneza kitalu nyumba na awamu ya pili itahusisha Vijana 100 watakaojifunza kilimo  cha kisasa kupitia kitalu nyumba.

Aidha, Baada ya mafunzo hayo Serikali inategemea Vijana hao watajiajiri kwenye sekta ya kilimo cha kisasa ambacho uzalishaji wake unazingatia ubora na kiwango kikubwa cha uzalishaji.

"Tumieni fursa hii kuzingatia mafunzo ili mpate ujuzi wa kujenga kitalu hicho muwe walimu Kwa wengine, pia kuhamasisha kilimo maeneo ya mjini ambapo eneo dogo, maji kidogo na mavuno mengi yenye ubora" alieleza mwakilishi huyo.

Aidha ili kutambua ujuzi waliopata Vijana hao, Ofisi ya Waziri Mkuu itawatunuku vyeti vya ushiriki wale wote  watakaofuzu.