VIKUNDI 90 UBUNGO KUNUFAIKA NA MIKOPO YA 10% YENYE THAMANI YA BILIONI 2.4

Posted on: March 6th, 2025

Vikundi 90 vya Wanawake, Vijana na Watu Wenye Ulemavu Wilaya ya Ubungo vinaenda kunufaika na Mikopo ya asilimia 10 yenye thamani ya shilingi 2,041,123,500/= inayotokana na mapato ya ndani  imetolewa rasmi Leo tarehe 6 machi, 2025 na Mkuu wa Wilaya ya Ubungo Mhe. Lazaro Twange  ambaye pia ni Mwakilishi wa Mkuu wa Mkoa wa Dar es Salaam ametoa Hundi ya Mikopo hiyo na kuwataka  wananufaika wa Mikopo hiyo kufanya shughuli za kujiwezesha kiuchumi ili waweze kufanya marejesho ya Mikopo hiyo.

Akizungumza katika hafla hiyo Mhe. Twange amewataka wanufaika wote watakaopata Fedha hizo wakatumie Fedha kwa malengo tajwa kama walivyoomba na sio vinginevyo.

"Fedha hizi si zawadi, Fedha hizi zinatakiwa zifanyiwe marejesho ili na wengine wapate kwa ajili ya kujiwezesha na wao wapate kipato kwa ajili ya kujikimu kiuchumi, hivyo safari hii lazima kila mnufaika afanye marejesho kwa wakati ni agizo na kila mmoja akatimize wajibu wake" alisisitiza Twange.

Twange, aliwaeleza pia lengo la Serikali ya Awamu ya sita ni kuhakikisha watanzania wote wanakuwa na kipato na katika kuwawezesha katika Mikopo hii ambayo inaenda kutolewa, Twange aliendelea kusema Ubungo imetoa Fedha hizo katika mapato yake ya ndani hivyo ni lazima Fedha hizo zirudishwe na wengine wapate.

Nae, Mstahiki Meya wa Manispaa ya Ubungo Mhe. Jaffar Nyaigesha amewaeleza vikundi vyote kuwa ni muhimu kutambua Mikopo hiyo haina riba na hiyo yote ni kuhakikisha wananchi wanainuka na kujikwamua kiuchumi hivyo ni lazima wafanye kila wawezavyo kufanya marejesho ili wengine wakope na watakaofanya marejesho vizuri waweze kukopa tena na tena .

Aidha, wanufaika wa Mikopo hiyo wameishukuru Manispaa kupitia idara ya maendeleo ya jamii  kwa kusimamia zoezi hilo ambalo linaenda kuwapa faraja na kuwainua kiuchumi . 

Na pia katika hafla hiyo, viongozi mbalimbali wameshiriki na wadau mbalimbali wa kifedha wakiwemo NMB, CRDB, TCB, NBC na DCB.