VIONGOZI WA MITAA WATAKIWA KUHAKIKI KAYA HEWA ZA TASAF

Posted on: January 8th, 2021

Viongozi wa  mitaa 50 Manispaa ya Ubungo  inayotekeleza mradi wa kunusuru kaya kupitia Mfuko wa maendeleo ya jamii TASAF wameagizwa  kuhakiki walengwa wanaonufaika na mfuko huo  ili kuhakikisha  kaya zisizostahili maarufu kama Kaya hewa zinaondolewa kwenye mpango huo.

Agizo hilo limetolewa leo januari 8, 2021 na Mratibu wa TASAF Manispaa ya Ubungo  Wakuru Nyaratha wakati alipofanya ziara ya kutembelea  viongozi hao na kueleza kuwa zoezi hilo la  uhakiki ni mwendelezo wa  uhakiki uliofanyika mwezi julai na novemba mwaka 2020 lengo ikiwa ni kuhakikisha mpango huo unanufaisha walengwa halisi.

Wakuru amefafanua kuwa  uhakiki uliofanyika awali mwezi julai na mwezi novemba mwaka  2020 kaya zote zilizobainika kukosa sifa ziliondolewa kwenye mfumo wa ruzuku ya TASAF hivyo  uhakiki wa sasa ni kujiridhisha zaidi endapo kuna kaya isiyo na sifa na bado inanufaika na mpango.

Wakuru amesema kuwa "muongozo wa TASAF unataka kaya zinazonufaika zisiwe kaya za viongozi wa serikali za mitaa, wastaafu, waajiriwa na watu wenye vipato vya kujitoshereza"

Baada ya uhakika  wa mwezi julai na novemba 2020, Manispaa ya Ubungo ina jumla ya kaya  2189 zinazonufaika na mfumo wa ruzuku kwa walengwa  TASAF  wa  kati ya kaya 2656 zilizokuwepo awali. Aidha katika uhakiki kaya 20 zilihama makazi, kaya 16 zilijitokea kwa hiari huku kaya 11 zikipoteza sifa kutokana na kifo, kaya 400 hazikujitokeza kwenye uhakiki.

Kwa upnde wake, Diwani wa kata ya Goba  Mhe. Ester Radislaus Ndoha  amekiri kuwepo kwa malalamiko ya baadhi ya kaya zisizo na sifa kunufaika na rukuzu inayotolewa na TASAF  huku wale wanaostahili kukosa fursa hiyo.

"Nitasimamia kuhakikisha tunafanya uhakiki makini ili kaya zisizo na sifa wakiwemo viongozi wa serikali za mitaa ziondolewe kwenye  mpango kama muongozo unavyotaka, lakini pia kumuunga mkono mheshimiwa Rais ambaye anataka mpango huu uwasaidie wale wasiojiweza kiuchumi angalau wawe na uhakika wa kupata mahitaji ya msingi.

Kwa malipo ya mwezi wa Oktoba, kaya  jumla ya shilingi  137,034,000 zilitolewa kwa kaya 1595.