VIONGOZI WA WAFANYABIASHARA SOKO LA MANZESE WALA KIAPO CHA UADILIFU

Posted on: June 19th, 2025

Viongozi wapya wa wafanyabiashara katika soko la Manzese wamekula kiapo cha uadilifu kwa watumishi wa umma mbele ya Kamishina wa viapo Asha Chande ili kuanza rasmi majukumu yao.

Kiapo hicho kimefanyika Juni 19, 2025 katika ukumbi wa mikutano wa Halmashauri ya Manispaa ya Ubungo, kimehusu viongozi wapya wa Vizimba,  Kuku na Wachinjaji waliochaguliwa katika uchaguzi wa Mei 5, 2025.

Akizungumza baada ya kiapo hicho, Mwanasheria wa Manispaa ya Ubungo Emily Ramadhan amewataka viongozi hao kuzingatia kiapo hicho na kufanya kazi kwa uadifilifu na uaminifu mkubwa kwasababu wameaminiwa ili kutoa huduma zenye tija kwa jamii.

"Lengo ni kuhakikisha kwamba wanajifunga na sheria, kanuni na taratibu za utumishi wa umma ili wakatekeleze majukumu yao kwa ufanisi na weledi. Kwa wale watakaokiuka na kukinzana na viapo vyao watachukuliwa hatua ikiwemo kufikishwa mahakamani" ~Amesema Ramadhan

Kwa upande wake Afisa biashara anayeshughulikia Manzese Bw. Mapembe amewasisitiza viongozi hao kutekeleza majukumu yao kikamilifu ikiwemo kusimamia ukusanyaji wa mapato, usafi, na ulinzi ili kukidhi matarajio ya Serikali na Wananchi.

Wakizungumza kwa niaba ya viongozi hao waliokula kiapo Bw. Haruna said Korongo, Mwenyekiti kitengo cha Kuku na Bw. Taji Kanuti, Mwenyekiti kitengo cha Vizimba kwa pamoja wameishukuru Manispaa ya Ubungo kwa kuwajengea uwezo na kuwafundisha taratibu za utumishi wa umma na kuahidi kwenda kuzisimamia kwa maslahi ya nchi na wananchi.

"Kiapo ni sheria, nitalinda kiapo changu kwa kuleta ustawi, na kusimamia bila ubaguzi kwani kiapo ni sehemu ya muongozo. Tunaahidi kwenda kutimiza majukumu yetu kwa mujibu wa kanuni na taratibu za Manispaa" Wamesema